الماتىداعى ارباتتا ديماش قۇدايبەرگەننىڭ ءانىن دالمە-دال ورىنداعان سەگىز جاستاعى بالانىڭ بەينەسىن كورگەن بولارسىز. ۆيرۋسقا اينالعان ۆيدەو ءۇش كۇننىڭ ىشىندە 2 ميلليونعا جۋىق قارالىم جيناپ، ءتۇرلى پابليكتەردە تاراپ كەتتى. جۇرت ۆيدەوداعى كىشكەنتاي دارىننىڭ ونەرىنە ءتانتى بولىپ، جىلى پىكىرىن جاۋدىرىپ جاتىر. ەلدىڭ ىقىلاسىنا بولەنگەن بالا كىم؟ اqshamnews.kz ءتىلشىسى "كىشكەنتاي ديماشتى" انىقتاپ، اناسىمەن تىلدەستى.
جەلى جۇلدىزىنا اينالعان بالانىڭ ەسىمى - ءادىل بەكتۇرسىن. نەبارى سەگىز جاستاعى زور داۋىس يەسى بيىل الماتى قالاسىنداعى، س.كوپبايەۆ اتىنداعى №186 ورتا مەكتەپتىڭ ءۇشىنشى سىنىبىن ءتامامداعان. انگە ءۇش جاسىنان اۋەس. ءقازىر قۇرمانعازى اتىنداعى مۋزىكالىق مەكتەپتە فورتەپيانو سىنىبىندا وقيدى. ءادىل بۇگىنگە دەيىن ءتۇرلى ءان بايقاۋلارىنا قاتىسىپ، 50-دەن استام ديپلوم مەن العىس حات يەلەنگەن.
"ءادىل ءان ايتقاندا جانىن سالىپ ايتادى"
ءادىلدىڭ اناسى ماقپال تۇرىسبەكوۆا ۇلىنىڭ ونەرگە دەگەن قادامى جايلى اڭگىمەلەپ بەردى. باستاپقىدا ماقپال حانىم ءادىلدى انگە ءوزى باۋلىعان.
"ءادىل 3 جاسىنان ءان ايتا باستادى. العاشىندا ءوزىم ۇيرەتتىم. كەيىن ۇيىرمەلەرگە قاتىسا باستادى. بىلتىر قۇرمانعازى اتىنداعى بالالار مۋزىكالىق مەكتەبىنە ءتۇسىپ، بيىل فورتەپيانو سىنىبىن اياقتادىق. قالالىق، حالىقارالىق بايقاۋلاردان كوپ جۇلدەسى بار. "Bala Show" فەستيۆالىندە، قايىرىمدىلىق كونسەرتتەردە ءان شىرقاعان. ءبىراق ارباتتاعى بەينەجازبا – جۇرتقا تانىلعان العاشقى ءساتى. ءادىل ءوزى ۇيالشاق، ءبىراق ءان ايتقاندا ەش ۇيالمايدى. جانىن سالىپ ايتادى. ساحنانى ساعىنىپ جۇرەدى"، – دەيدى اناسى.
"الەۋمەتتىك جەلىنىڭ مىقتىلىعىنان ءبىر كۇندە تانىمال بولدىق"
ماقپال حانىم ۇلىنىڭ بۇعان دەيىن استانادا، ەسىل بويىنداعى مۋزىكانتتارمەن بىرگە ءان شىرقاعانىن ايتتى. حالىقتىڭ قوشەمەتى ۇناپ، ءادىل بۇل ءساتتى تاعى دا قايتالاعىسى كەلگەن. اناسى "الماتىدا تاعى دا ايتامىز" دەگەن ۋادەسىن ورىنداعان.
"ارباتتاعى ونەرىن بەينەجازباعا ءتۇسىرىپ، Instagram مەن TikTok-قا جۇكتەگەن – اسەت سەرعازى ەسىمدى ازامات ەكەن. سول كىسىنىڭ ارقاسىندا بالامىز ءبىر كۇندە تانىمال بولىپ شىعا كەلدى. العاشقى بولىپ استاناداعى تانىسىمىز حابارلاسىپ، “بالالارىڭ جەلىدە ءجۇر” دەدى. ءوزىمىز الەۋمەتتىك جەلىگە كوپ ۇڭىلە بەرمەيتىن ەدىك، ءبىراق سول ساتتە ونىڭ قانشالىقتى قۋاتتى قۇرال ەكەنىن تۇسىندىك. ادامداردىڭ جىلى پىكىرلەرىن وقىپ، ءوزىمىز دە، ءادىل دە شىن قۋانىپ ءجۇر. ءاربىر پىكىر مەن جازىلۋشىعا ريزا بولىپ جاتىرمىز"، – دەيدى ءادىلدىڭ اناسى.
ءادىلدىڭ ارمانى نە؟
ءادىلدىڭ كۋميرى – ديماش قۇدايبەرگەن. ونىڭ كوپ ءانىن جاتتاپ الىپ، بىرگە قوسىلىپ ايتادى. ارباتتا شىرقاعان “ليۋبوۆ ۋستاۆشيح لەبەدەي” ءانى دە – سۇيىكتى تۋىندىلارىنىڭ ءبىرى.
"ءادىل ءوزى كىشكەنتاي بولسادا ديماشتىڭ ۇلكەن جانكۇيەرى. ديماشتىڭ اندەرىن سۇيسىنە تىڭدايدى جانە رەپەرتۋارىنداعى ءبىراز ءانىن بىرگە قوسىلىپ شىرقايدى. ديماشتىڭ شىعارماشىلىعىنا قىزىعىپ، ساحنادا ورىنداپ جۇرگەنىنە ءبىر جىلداي بولىپ قالدى. ونىمەن بىرگە ونەر كورسەتۋ - ۇلكەن ارمانى"، – دەيدى اناسى.
"بالام ەلىنە ەلەۋلى ازامات بولسا ەكەن دەيمىن"
ءادىل ءان ايتىپ قانا قويماي، فورتەپيانودا وينايدى، شاحمات پەن توعىزقۇمالاققا دا قىزىعادى. ءتىپتى شاحماتتان 4-رازرياد العان. ءبىراق مەكتەپ پەن مۋزىكاعا بىردەي ۋاقىت بولە الماعان سوڭ، شاحماتتى ۋاقىتشا دوعارعان. ال ءان – باستى ءحوببيى.
"ءادىل بولاشاقتا كونسەرۆاتورياعا ءتۇسىپ، وپەرا ءانشىسى بولامىن دەيدى. ءبىز ارينە ونىڭ قالاۋىن قولدايمىز. بالام ەلىنە ەلەۋلى، حالقىنا قالاۋلى ازامات بولسا ەكەن دەيمىن. ءاربىر جىلى لەبىزىن جاۋدىرىپ جاتقان جۇرتقا العىس ايتامىن"، – دەيدى ماقپال تۇرىسبەكوۆا.
ايتا كەتەيىك، ءادىلدىڭ ۆيدەوسىن اqshamnews.kz جەلىگە جۇكتەگەن سوڭ، تانىمال تۇلعالار دا بايقاپ، ءتۇرلى ۇسىنىستار تۇسكەن. كۇيشى اسىلبەك ەنسەپوۆ رەداكسيا تىلشسىمەن بايلانىسقا شىعىپ، ءادىلدى ۇلكەن ساحنادا ونەر كورسەتۋگە شاقىردى.