قازاقستاندىقتاردىڭ باسىم كوپشىلىگى مەملەكەت پرەزيدەنتىنە سەنىم ارتادى

الەۋمەتتىك ساۋالناما ناتيجەسى بەلگىلى بولدى.

بيىل 9-28 ماۋسىم ارالىعىندا Qalaisyn.kz پلاتفورماسىندا ونلاين-ساۋالناما ادىسىمەن پرەزيدەنت قاسىم-جومارت توقايەۆقا، سونداي-اق مەملەكەتتىك ورگاندارعا سەنىمگە قاتىستى الەۋمەتتىك زەرتتەۋ جۇرگىزىلدى، دەپ حابارلايدى Almaty-akshamy.kz Baq.kz سىلتەمە جاساپ.

زەرتتەۋ جاڭادان قۇرىلعان وبلىستاردى قوسا العاندا، قازاقستاننىڭ بارلىق اۋماعى بويىنشا 18 جانە ودان اسقان جاستاعى 6 مىڭ رەسپوندەنت اراسىندا وتكىزىلدى. ساۋالناما ناتيجەلەرى رەپرەزەنتاتيۆتى جانە قازاقستاننىڭ بارلىق حالقىنا قاتىستى بولجامدالادى.

ساۋالناما دەرەكتەرى كورسەتكەندەي، مەملەكەت باسشىسى زور سەنىمگە يە - وعان قازاقستاندىقتاردىڭ 83،63%-ى سەنەدى. سوسيولوگيالىق مونيتورينگ قورىتىندىسى سۇرالعانداردىڭ 78،81%-ى مەملەكەت باسشىسى جۇمىسىنىڭ قازىرگى ناتيجەلەرىنە قاناعاتتانعانىن كورسەتتى. ال 59،37%-ى ق.ك. توقايەۆتىڭ پرەزيدەنت لاۋازىمىندا بولعان كەزەڭىندە ەلدەگى جاعداي جاقساردى دەپ سانايدى.

پرەزيدەنتكە دەگەن سەنىم دەڭگەيىنىڭ ارتۋى بايقالىپ وتىرعانىن ايتا كەتكەن ءجون. ماسەلەن، ءساۋىر ايىنداعى ساۋالناماعا سايكەس، ساۋالناماعا قاتىسقان قازاقستاندىقتاردىڭ 70%-دان استامى پرەزيدەنتكە سەنىم بىلدىرگەن.

سەنىمنىڭ ءوسۋ سەرپىنى كونستيتۋسيالىق رەفورمانىڭ ءىس جۇزىندە جۇزەگە اسىرىلۋىنىڭ باستالۋىمەن، العاشقى ۇلتتىق قۇرىلتاي وتكىزۋ سياقتى ءىرى رەسپۋبليكالىق جوبالاردىڭ ىسكە اسىرىلۋىمەن، مەملەكەت باسشىسىنىڭ ءبىرقاتار ەلدەگى بەلسەندى سىرتقى ساياسي قىزمەتىمەن جانە ەل ءۇشىن ماڭىزدى باسقا دا وقيعالارمەن تۇسىندىرىلەدى.

Qalaisyn.kz پلاتفورماسىندا بيىل 21-23 ماۋسىم ارالىعىندا 18 جاستان اسقان 1200 قازاقستاندىق اراسىندا جۇرگىزىلگەن الدىڭعى الەۋمەتتىك ساۋالناما ناتيجەلەرى كورسەتكەندەي، مەملەكەت باسشىسىنىڭ سوڭعى جەتىستىكتەرىنىڭ اراسىندا ۇلتتىق قۇرىلتايدىڭ قۇرىلۋى ەرەكشە جوعارى اتاپ وتىلەدى - قازاقستاندىقتاردىڭ 74،52%-ى وسى باستامانى قولدايدى. ال سۇرالعانداردىڭ 73،89%-ى ونىڭ جۇمىسىنىڭ باستالۋىنا بايلانىستى ەلدەگى جاعدايدىڭ جاقسارۋىن كۇتۋدە.