بارلىعىمىز ساياحاتقا شىققاندى ۇناتامىز. جاز مەزگىلى كەلە سالا ادامدار جازعى دەمالىسىن جوسپارلاي باستايدى. بۇل ورايدا كوپشىلىگى قاي مەزگىلدە قاي مەملەكەتكە بارىپ دەمالعان دۇرىس ءارى ءتيىمدى ەكەنىن بىلە بەرمەيدى. سەبەبى ءار مەزگىلدىڭ ءوز ەرەكشەلىگى بولادى. وسىعان وراي Egemen.kz ءتىلشىسى ءتورت ءتۇرلى مەزگىلدە قاي ەلگە بارىپ دەمالعان دۇرىس ەكەندىگىن انىقتادى، دەپ حابارلايدى Almaty-akshamy.kz.
ساياحاتتاۋدى ۇناتپايتىن ادام كەمدە-كەم. جىلدىڭ قاي مەزگىلى بولسىن كوپتەگەن ازاماتتار شەتەلگە شىعىپ دەمالعاندى ءجون كورەدى. وسىعان وراي ەڭ الدىمەن سۇرانىسقا يە مەملەكەتتەر قاتارىن انىقتاپ الۋ قاجەت.
بۇل جايىندا «Gotour» تۋريستىك اگەنتتىگىنىڭ وفيس باسشىسى ايسۇلۋ ماگزيمبايەۆا ايتىپ بەردى. ونىڭ ايتۋىنشا، قازىرگى ۋاقىتتا تۇركيا، ەگيپەت، ءباا ەلدەرىنە سۇرانىس كوپ.
«سۇرانىسقا يە مەملەكەتتەر قاتارىندا تۇركيا، ەگيپەت، بىرىككەن اراب امىرلىگى بار. سونداي-اق بيىل جازدا قازاقستاندىقتار ءۇشىن مالديۆ ارالدارىنا ۇشۋ ءتيىمدى بولادى. سەبەبى مالديۆ ارالدارىنا ارنالعان تىكەلەي چارتەرلىك رەيستەر (All inclusive) اشىلدى. بۇل باعا جاعىنان تۇركيا ەلىمەن سالىستىرعاندا شامالى ايىرماشىلىقتى عانا قۇرايدى. سونداي-اق جاڭادان اشىلعان اۋە باعىتى – قاتار مەملەكەتى. بۇل ەلدىڭ دوحا قالاسىنا ۇشۋ وتانداستىرىمىز ءۇشىن ءتيىمدى بولادى»، -دەيدى وفيس باسشىسى.
ماماننىڭ ايتۋىنشا، ءار ەلگە ۇشۋ سول ەلدىڭ ءوزىنىڭ باعاسىنا جانە ۇشۋ ۇزاقتىعىنا بايلانىستى بولادى. سونىمەن قاتار جانارمايدىڭ قىمباتتاۋىنا بايلانىستى بيلەت قۇنى وزگەرەدى.
«قازىرگى تاڭدا ەڭ ارزان مەملەكەت – بىرىككەن اراب امىرلىگى. بۇل مەملەكەتكە 1 اپتاعا ساياحاتقا شىعۋ ءبىر ادامعا شامامەن 180-200 مىڭ تەڭگەنى قۇرايدى»، -دەيدى ا.ماگزيمبايەۆا.
سونىمەن قاتار ءار جىل مەزگىلىندە اۋا رايىنا بايلانىستى ءارتۇرلى مەملەكەتتەرگە ساياحاتقا شىققان ابزال. مىسالى ماماننىڭ ايتۋى بويىنشا، كوكتەم جانە كۇز مەزگىلدەرىندە كوبىنە ءباا، مىسىر، قاتار، تايلاند ەلدەرىنە ۇشقان دۇرىس.
«تايلاند، گوا، مالديۆ ارالدارىنا قىس ايلارىندا ۇشقان وتە جاقسى. كوكتەم ايىندا ۆەتنام مەملەكەتىنە ناعىز ساياحات ماۋسىمى باستالادى. جاز ايلارىندا ارينە تۇركيا مەملەكەتى سۇرانىستا بولادى. مىسىردى دا قاراستىرۋعا بولادى، سەبەبى ول جاقتىڭ كليماتى قۇرعاق بولعاندىقتان ىستىعى جەڭىل سەزىلەدى. سونداي-اق ۆەتنام جانە ەۆروپا ەلدەرىنە ۇشۋ جاز ايىندا وتە ءتيىمدى بولادى. بيىلعى كۇز مەزگىلىندە حاينان ارالدارىنا باعىتتالعان جاڭا اۋە رەيسىنىڭ اشىلۋى كۇتىلەدى»، -دەيدى مامان.
ءار مەملەكەتتىڭ ءوزىنىڭ سالتى بولعاندىقتان، سول مەملەكەتكە بارار الدىندا الدىمەن تۋراگەنتتىكتەن الدىن-الا ساپارعا شىعاتىن مەملەكەت جايلى ءبىلىپ العان ءجون. مىسالى، مىسىردا تەڭىزدەن قىزىل كىتاپقا ەنگىزىلگەن تاس، راكۋشكا، كارال الۋعا قاتاڭ تىيىم سالىنعان. العان جايعدايدا ۇلكەن مولشەردە ايىپپۇل سالىنادى. سونىمەن قاتار مۇسىلمان ەلدەرىندە قاتتى اشىق كيىنىپ، جاقىنداسۋعا بولمايدى.