قازاقستان تمد ەلدەرى اراسىندا ىسكەرلىك تۋريزم كوشباسشىلارىنىڭ ءبىرى اتاندى. ەكى بىردەي حالىقارالىق ۇيىمنىڭ وكىلدەرى ەلىمىزگە كەلىپ، ىشكى ءتۋريزمنىڭ جاي-كۇيىمەن تانىستى، دەپ حابارلايدى Almaty-akshamy.kz Kazakh Tourism ۇلتتىق كومپانياسىنىڭ باسپا ءسوز قىزمەتىنە سىلتەمە جاساپ.
ەۋروپا بويىنشا حالىقارالىق كونگرەستەر مەن كونفەرەنسيالار قاۋىمداستىعىنىڭ (ICCA) وڭىرلىك مەنەدجەرى ەفي كۋدەلي جانە IMEX Frankfurt حالىقارالىق كورمەسىنىڭ وكىلى ليز براند باستاعان حالىقارالىق ءىس-شارالاردى ۇيىمداستىرۋشىلار مەن ب ا ق وكىلدەرى استانا جانە الماتى قالالارىنا ساپارمەن كەلدى.
دەلەگاسيا قازاقستاندىق سەرىكتەستەرمەن جانە تۋريستىك بيزنەس وكىلدەرىمەن ىنتىماقتاستىق جانە حالىقارالىق ءىس-شارالاردى وتكىزۋ بويىنشا كەزدەسۋ وتكىزدى. كەزدەسۋگە قوناق ءۇي وكىلدەرى، ءىس-شارالار وتكىزەتىن الاڭداردى باسقارۋشى كومپانيالاردىڭ باسشىلارى مەن تۋروپەراتورلار قاتىستى.
ICCA تالاپتارىنا سايكەس، رەيتينگىگە ەنۋ ءۇشىن جىلىنا كەم دەگەندە 3 حالىقارالىق دەڭگەيدەگى وتكىزۋ كەرەك. سونىمەن قاتار، ۇيىمداستىرىلعان ءىس-شارالارعا جوق دەگەندە 50 حالىقارالىق دەلەگاسيا قاتىسۋى مىندەتتى.
اتالعان قاۋىمداستىقتىڭ ستاتيستيكاسىنا سايكەس، 2013-2022 جىلدار ارالىعىندا قازاقستاندا تامىز-قازان ايى ارالىعىندا 50-دەن 500-گە دەيىن دەلەگاسيانىڭ قاتىسۋىمەن ءىس-شارا ءوتتى.
«ەۋروپا بويىنشا وڭىرلىك مەنەدجەر رەتىندە، بۇل – مەنىڭ العاشقى ساپارىم. ساپار بارىسىندا تۋريستىك قوعامداستىق وكىلدەرىمەن تانىسىپ، ورتالىق ازيادا حالىقارالىق ءىس-شارالاردى وتكىزۋدە كوشباسشى قالالاردىڭ ءبىرى سانالاتىن استانا مەن الماتىنىڭ ىسكەرلىك تۋريستىك ينفراقۇرىلىمىمەن تانىسقانىما قۋانىشتىمىن»، - دەيدى ەۋروپا بويىنشا حالىقارالىق كونگرەستەر مەن كونفەرەنسيالار قاۋىمداستىعىنىڭ (ICCA) وڭىرلىك مەنەدجەرى ەفي كۋدەلي.
ICCA-نىڭ وتكەن جىلعى ەلدەر مەن قالالار رەيتينگىسىندە قازاقستان گرۋزيا مەن ءازىربايجاننان كەيىن ءۇشىنشى ورىندا ورنالاسقان. ال، وتكىزىلگەن حالىقارالىق ءىس-شارالار سانى بويىنشا ءوڭىردىڭ بەس ەلى اراسىندا ءۇشىنشى ورىندا تۇر (الماتى – ءۇشىنشى قالا، استانا – بەسىنشى).
2019 جىلى MICE يندۋسترياسى ەلىمىزگە 1 ترلن اقش دوللار ينۆەستيسيا اكەلدى، 10 ملن جۇمىس ورنىن قۇرىپ، 1،5 ملرد-قا جۋىق تۋريست جينادى. بۇل ىسكەرلىك تۋريزم ادەتتەگى جەكە تۋريزمگە قاراعاندا 3 ەسە كوپ پايدا اكەلەتىنىن كورسەتەدى. MICE قولداۋ باعدارلاماسىن تۇراقتى قارجىلاندىرۋ جاعدايىندا قازاقستاننىڭ وڭىردە ىسكەرلىك ءتۋريزمدى ىلگەرىلەتۋدە كوشباسشى بولۋعا بارلىق مۇمكىندىگى بار.
ايتا كەتەيىك، MICE يندۋسترياسى – ءارتۇرلى كورپوراتيۆتىك جانە ىسكەرلىك ءىس-شارالاردى ۇيىمداستىرۋمەن جانە وتكىزۋمەن بايلانىستى ىسكەرلىك تۋريزم يندۋسترياسىنىڭ سالاسى.
ICCA (International Congress and Convention Association) – حالىقارالىق كونگرەسستەر مەن كونفەرەنسيالار قاۋىمداستىعى، بۇل – حالىقارالىق قاۋىمداستىقتاردىڭ كەزدەسۋ يندۋسترياسى ءۇشىن جاھاندىق قاۋىمداستىق جانە ءبىلىم ورتالىعى.