«مەملەكەتتىك اننۋيتەتتىك كومپانيا «ءومىردى ساقتاندىرۋ كومپانياسى» اق دەرەكتەرى بويىنشا 2024 جىلى 37،7 مىڭ قازاقستاندىق ءۇشىن ساقتاندىرۋ تولەمدەرىنىڭ كولەمى 2،4 ملرد تەڭگەدەن استى، دەپ حابارلايدى aqshamnews.kz.
«نەگىزگى مىندەتتەردىڭ ءبىرى جۇمىسكەرلەردى ەڭبەك مىندەتتەرىن ورىنداۋ كەزىندە جازاتايىم وقيعالاردان مىندەتتى ساقتاندىرۋدى قامتاماسىز ەتۋ بولىپ تابىلادى. جۇمىس بەرۋشىگە وسىنداي شارتتار جاساسقانى ءۇشىن جاۋاپكەرشىلىك جۇكتەلەدى، ال بۇل مىندەتتەمەدەن جالتارعان جاعدايدا ايىپپۇل سانكسيالارى كوزدەلەدى. بۇگىندە ماك-تا جۇمىس بەرۋشىلەرمەن جاسالعان 1،8 مىڭ شارت بويىنشا 50 901 جۇمىسكەر ساقتاندىرىلعان»، – دەپ اتاپ ءوتتى ماك باسقارما ءتوراعاسى قۋانىش مۇقاجانوۆ.
الەۋمەتتىك تاۋەكەلدەر تۋىنداعان كەزدە ساقتاندىرىلعان جۇمىسكەرلەر ءۇشىن ماك-تان مىناداي تولەم تۇرلەرى جۇزەگە اسىرىلادى:
- دەنساۋلىققا زيان كەلتىرۋگە بايلانىستى قوسىمشا شىعىنداردى وتەۋ (دارىلىك زاتتار، وڭالتۋ قۇرالدارى جانە ساناتورييلىك-كۋرورتتىق ەمدەۋ)؛
- كاسىپتىك ەڭبەككە قابىلەتتىلىگىنەن ايىرىلعان ادامدار ءۇشىن اننۋيتەتتىك ساقتاندىرۋ بويىنشا مەرزىمدى تولەمدەر (وندىرىستەگى جازاتايىم وقيعاعا بايلانىستى)؛
- اسىراۋشىسىنان ايىرىلۋىنا بايلانىستى اننۋيتەتتىك ساقتاندىرۋ بويىنشا مەرزىمدى تولەمدەر؛
- زەينەتكەرلىك الدىنداعى اننۋيتەت شارتتارى بويىنشا مەرزىمدى تولەمدەر (زياندى جاعدايلاردا جۇمىس ىستەيتىن)؛
- وندىرىستەگى جازاتايىم وقيعا سالدارىنان قايتىس بولعان جاعدايدا جۇمىسكەرلەردى جەرلەۋ بويىنشا شىعىستار.
بۇدان باسقا، ماك «دەمەۋ» ءومىردى ەرىكتى ساقتاندىرۋ جانە زەينەتاقى اننۋيتەتى قىزمەتتەرىن ۇسىنادى.
بجزق-دا زەينەتاقى جيناقتارىنىڭ جەتكىلىكتى سوماسى بولعان كەزدە زەينەتاقى اننۋيتەتى شارتىن جاساسۋ ازاماتتارعا زەينەتاقى تولەمدەرىن بەلگىلەنگەن زەينەتاقى جاسىنان ەرتە الۋعا مۇمكىندىك بەرەدى. اتاپ ايتقاندا، ەر ادامدار 55 جاستان باستاپ، ال ايەلدەر 53 جاستان باستاپ تولەم الۋىنا بولادى. بۇل رەتتە كەمىندە بەس جىل ىشىندە جۇمىس بەرۋشىلەر ولار ءۇشىن مىندەتتى كاسىپتىك زەينەتاقى جارنالارىن جۇرگىزىلگەن قازاقستاندىقتار 50 جاستان باستاپ تولەمدەردى الا باستايدى.
زەينەتاقى اننۋيتەتىنىڭ باستى ارتىقشىلىعى ساقتاندىرۋ كومپانياسىنا اۋدارىلعان جيناقتاردىڭ كولەمىنە قاراماستان، تولەمدەردى ءومىر بويى جۇزەگە اسىرۋ بولىپ تابىلادى.
2025 جىلى زەينەتاقى اننۋيتەتى شارتىن جاساسۋ ءۇشىن جيناقتاردىڭ تومەندەگىدەي سوماسى قاجەت:
- ەرلەر ءۇشىن – 9 123 466 تەڭگە؛
- ايەلدەر ءۇشىن – 11 963 930 تەڭگە؛
- مىندەتتى كاسىپتىك جارنالارى بار ەر ادامدار ءۇشىن – 7 744 625 تەڭگە؛
- مىندەتتى كاسىپتىك جارنالارى بار ايەلدەر ءۇشىن – 10 101 751 ملن تەڭگە.
قۋانىش مۇقاجانوۆتىڭ ايتۋىنشا، 2024 جىلى جۇمىسكەرلەردى مىندەتتى ساقتاندىرۋ شارتتارى بويىنشا جينالعان ساقتاندىرۋ سىيلىقاقىلارىنىڭ كولەمى 1،4 ملرد تەڭگەنى، ال زەينەتاقى اننۋيتەتى شارتتارى بويىنشا جينالعان ساقتاندىرۋ سىيلىقاقىلارىنىڭ كولەمى 1،2 ملرد تەڭگەنى قۇرادى.
وسىلايشا، بۇگىندە ماك ساقتاندىرۋدىڭ 3 ءتۇرى بويىنشا قىزمەت كورسەتەدى. 2024 جىلدىڭ قورىتىندىسى بويىنشا بارلىق ساقتاندىرۋ ونىمدەرى بويىنشا ماك-تا 51،3 مىڭ ازامات بويىنشا 2،2 مىڭنان استام شارت تىركەلگەن.