وتاندىق ونەرپاز ايگەرىم التىنبەك «لا سكالا» تەاترى اكادەمياسىنىڭ تاعىلىمداماسىنا قابىلداندى، دەپ حابارلايدى aqshamnews.kz
بەينەجازبا ارقىلى وتكەن الدىن الا ىرىكتەۋگە 400-دەن استام ۇمىتكەر قاتىسقان. ولاردىڭ ىشىنەن 12 ۇزدىك ورىنداۋشى تاڭدالىپ الىندى. سولاردىڭ قاتارىندا قازاقستاننىڭ اتىنان قاتىسقان ايگەرىم التىنبەك تە بار.
وپەرا ءانشىسى ايگەرىم التىنبەك – كوپتەگەن حالىقارالىق ۆوكالدىق بايقاۋلاردىڭ لاۋرەاتى.
ول تانىمال كومپوزيتور دجاكومو ءپۋچچينيدىڭ 100 جىلدىعىنا وراي ۇيىمداستىرىلعان حالىقارالىق وپەرا انشىلەرى بايقاۋىندا جەڭىمپاز اتاندى.
سونىمەن قاتار يتاليانىڭ مودەنا قالاسىندا وتكەن نيكولاي گياۋروۆ اتىنداعى وپەرا انشىلەرىنىڭ حالىقارالىق بايقاۋىندا ءۇشىنشى ورىندى يەلەندى. قازاقستاندىق ءانشى اتاقتى يتاليالىق وپەرا ءانشىسى ميرەللا فرەنيدىڭ ارنايى سىيلىعىن الدى. الەمنىڭ 470 قاتىسۋشىسى قاتىسقان رەناتا تەبالدي اتىنداعى حالىقارالىق ۆوكال كونكۋرسىندا ونەرپاز ەكىنشى ورىنعا يە بولدى.
25 ماۋسىمدا الەمگە ايگىلى حوسە كاررەراستىڭ كونسەرتى وتەدى. وسى كەشتە ايگەرىم التىنبەك تە بوي كورسەتەدى. كونسەرتتە الەمدىك وپەرا اريالار شىرقالىپ، تانىمال دۋەتتەر ونەر كورسەتەدى.
27–28 ماۋسىمىندا يتاليانىڭ نەاپول قالاسىندا اندرەا بوچەلليدىڭ مەرەيتويلىق كونسەرتىنە قاتىسىپ، اتى اڭىزعا اينالعان تەنورمەن ءبىر ساحنادا ءان شىرقايدى.
بۇل جەتىستىك – ونىڭ بىلىمگە دەگەن ۇمتىلىسى مەن كاسىبي شەبەرلىگىنىڭ جەمىسى. سونىمەن قاتار مەملەكەتتىڭ جاس تالانتتاردى قولداۋعا باعىتتالعان اۋقىمدى جۇمىسىنىڭ ناتيجەسى.