قازاقستان قورعانىس مينيسترلىگىنىڭ دەلەگاسياسى كەنيا استاناسى نايروبيدە وتكەن حالىقارالىق بىتىمگەرلىك دايىندىق ورتالىقتارى قاۋىمداستىعىنىڭ (IAPTC) 27ء-شى كونفەرەنسياسىنا قاتىستى.
حالىقارالىق بەيبىتشىلىكتى قولداۋ وقۋ ورتالىعىندا 80 مەملەكەتتەن بىتىمگەرلىك دايىندىق ورتالىقتارى مەن حالىقارالىق ۇيىمداردىڭ 300-دەن اسا وكىلى جينالدى، دەپ حابارلايدى Almaty-akshamy.kz ق ر قورعانىس مينيسترلىگىنە سىلتەمە جاساپ.
كونفەرەنسيا دەلەگاتتارى كۇردەلى بىتىمگەرلىك وپەراسيالارعا بىتىمگەرلەردى دايىنداۋداعى سەرىكتەستىكتىڭ ءرولىن تالقىلادى.
«كونفەرەنسياعا قاتىسۋ بىتىمگەرلىك قىزمەت سالاسىنداعى اعىمداعى ۇردىستەرمەن جانە تالاپتارمەن تانىسۋعا، جاڭا بايلانىستار ورناتۋعا مۇمكىندىك بەردى. قولداعى بار مالىمەتتەردى ەسكەرە وتىرىپ، ءبىز ۇلتتىق بىتىمگەرلىك كونتينگەنتىن دايارلاۋ باعدارلاماسىن ۋاقتىلى بەيىمدەي الامىز»، – دەدى بىتىمگەرلىك دايىندىق ورتالىعىنىڭ باستىعى پولكوۆنيك باۋىرجان نىعمەتۋللين.
بۇل شارا ءبىرىنشى كەزەكتە بىتىمگەرلىك الەۋەتتى ارتتىرۋعا، حالىقارالىق ۇيىمداردىڭ، ۇكىمەتتەردىڭ جانە توتەنشە جاعدايلارعا دەن قويۋ تيىمدىلىگىن ارتتىرۋعا مۇددەلى جەرگىلىكتى بيلىك وكىلدەرىنىڭ ستراتەگيالىق ىنتىماقتاستىعىن باعالاۋعا جانە ونى دامىتۋعا باعىتتالعان.
بىتىمگەرلىك دايىندىق ورتالىقتارىنىڭ حالىقارالىق قاۋىمداستىعى 1995 جىلى قۇرىلعانىن ايتا كەتۋ كەرەك. ترەنينگتەر، ءبىلىم بەرۋ باعدارلامالارى مەن زەرتتەۋ باستامالارىنىڭ ارقاسىندا بۇكىل الەمنىڭ بىتىمگەرلىك دايارلاۋ ورتالىقتارى 190 ەلدەن 50 مىڭنان استام بىتىمگەردى ءساتتى دايىندادى.