8 تامىزدا الماتى وبلىسى جامبىل اۋدانىنا قاراستى ۇلكەن اۋىلى ماڭىندا قازاقستان تاريحىنداعى العاشقى اتوم ەلەكتر ستانسياسىنىڭ (اەس) قۇرىلىسى رەسمي تۇردە باستالادى، دەپ حابارلايدى اqshamnews.kz. بۇل تۋرالى اتوم ەنەرگياسى اگەنتتىگى مالىمدەدى.
سالتاناتتى ءراسىم بارىسىندا جوبانىڭ رەسمي اشىلۋى وتەدى. جيىنعا مەملەكەتتىك ورگاندار وكىلدەرى قاتىسىپ، ءسوز سويلەيدى. سونىمەن قاتار، توپىراق سىنامالارىن الۋ ماقساتىندا بۇرعىلاۋ جۇمىستارى باستالىپ، الىنعان ۇلگىلەر كەيىننەن زەرتتەۋ ءۇشىن رەسەيلىك تاراپقا تاپسىرىلادى. كاپسۋلانى تاپسىرۋ ءراسىمى دە رەسمي تۇردە وتەدى.
اەس جوباسىنىڭ باس مەردىگەرى رەتىندە رەسەيلىك "روساتوم" كومپانياسى تاڭدالعان. ول كونسورسيۋمنىڭ جەتەكشىسى رەتىندە قۇرىلىستىڭ نەگىزگى جۇمىستارىنا جاۋاپتى بولادى.
ايتا كەتەيىك، بيىل اقپاندا ۇلكەن اۋىلى اەس سالىناتىن رەسمي ورىن رەتىندە بەكىتىلگەن بولاتىن. بۇعان دەيىن بۇل ايماق الەۋەتتى نىساندار قاتارىندا قاراستىرىلعان ەدى.
2024 جىلدىڭ قاڭتارىندا مەملەكەت باسشىسى قاسىم-جومارت توقايەۆ ۇكىمەت پەن "سامۇرىق-قازىنا" قورىنا اتوم ەنەرگەتيكاسىن دامىتۋ ستراتەگياسىن ازىرلەۋدى، سونىڭ ىشىندە ەكىنشى اتوم ستانسياسىنىڭ ورنىن انىقتاۋدى تاپسىرعان بولاتىن.