استانادا ەر ادام ايەلدى كولىگىنىڭ جۇكسالعىشىندا تاسىمالداعانى ءۇشىن اكىمشىلىك جازاعا تارتىلىپ، ۋاقىتشا ۇستاۋ يزولياتورىنا قامالدى، دەپ حابارلايدى اqshamnews.kz. بۇل وقيعاعا بايلانىستى بەينەجازبا الەۋمەتتىك جەلىدە تارادى.
ۆيدەودا ەر ادامنىڭ كولىك جۇك سالعىشىندا جاتقان ايەلمەن سويلەسىپ تۇرعانى، كەيىننەن جۇكسالعىشتى جاۋىپ، كولىككە ءمىنىپ كەتكەنى كورىنەدى.
"اۋلادا ۇرىسىپ تۇردى، ايەل جۇكسالعىشقا ءوزى ءمىنىپ العان"، – دەلىنگەن ۆيدەونىڭ استىندا.
وقيعا 14 شىلدەدە استانانىڭ سارىارقا اۋدانىندا بولعان. قالالىق پوليسيا دەپارتامەنتىنىڭ حابارلاۋىنشا، قۇقىقبۇزۋشى انىقتالىپ، اكىمشىلىك جاۋاپكەرشىلىككە تارتىلعان.
"وسى قۇقىقبۇزۋشىلىقتى جاساعانى ءۇشىن سوت اكىمشىلىك جازا تاعايىندادى. ءقازىر قۇقىقبۇزۋشى استانا قالالىق پوليسيا دەپارتامەنتىنىڭ اكىمشىلىك قاماۋعا الىنعان تۇلعالارعا ارنالعان ارنايى ۋاقىتشا ۇستاۋ يزولياتورىنا قامالدى"، – دەلىنگەن سارىارقا اۋداندىق پوليسيا ءبولىمىنىڭ حابارلاماسىندا.