الماتى ەلىمىزدەگى جاستار ورتالىعى بولىپ قالا بەرمەك. ءقازىردىڭ وزىندە قالادا 11 كوميۋنيتي ورتالىق جۇمىس ىستەسە، جىلدىڭ سوڭىنا دەيىن وسىنداي ورتالىقتىڭ تاعى بەسەۋىن اشپاقشى. تامىزدىڭ 3ء-ى مەن 12ء-سى ارالىعىندا شاھاردىڭ بارلىق اۋدانىندا ALMA LOVE دەپ اتالاتىن ۇلكەن فەستيۆال ءوتىپ جاتىر. ەندى، پرەزيدەنتتىڭ باستاماسىمەن 18 تامىزدان باستاپ الماتى رەسمي تۇردە تۇركى الەمىندەگى جاستار ورتالىعى بولىپ تا بەكىتىلدى. وڭىرلىك كوممۋنيكاسيالار ورتالىعىندا وتكەن پرەسس-كونفەرەنسيادا الماتىنىڭ جاستار ساياساتى باسقارماسىنىڭ باستىعى ازيز كاجدەنبەك وسىلاي دەيدى.
الماتىدا تۇراتىنداردىڭ 712 مىڭى جاستار ەكەن. بۇل - قالا تۇرعىندارىنىڭ ۇشتەن ءبىرى دەگەن ءسوز. شاھارداعى ساياساتتىڭ ءوزى وسىعان سەپ بولىپ جاتىر. سوڭعى جىلدارى الماتى جاستار ساياساتىنا كوپ كوڭىل ءبولىپ، جاستار قاي سالادا بولسىن ءوزىن ەركىن سەزىنەتىندەي ەتىپ، بارىنشا جاعداي جاساپ جاتىر.
ءقازىردىڭ وزىندە قالادا 11 كوميۋنيتي ورتالىق جۇمىس ىستەسە، جىلدىڭ سوڭىنا دەيىن وسىنداي ورتالىقتىڭ تاعى بەسەۋىن اشقالى وتىر. بۇلار جاستاردىڭ وسىپ-ونۋىنە مۇمكىندىك بەرەتىن، كەڭەسەتىن، پىكىر الماساتىن، شىعارماشىلىعىن شىڭدايتىن، IT-ترەنينگتەن ءوتىپ، ءتىل ۇيرەنەتىن الاڭ. بۇل ورتالىقتار جاسوسپىرىمدەردەن باستاپ جاس انالاردى، NEET ساناتىنداعى جاستار مەن بولاشاق كاسىپكەرلەردى قامتىعان. جارتى جىلدىڭ ىشىندە وسى ورتالىقتاردا مىڭنان استام ءىس-شارا بولىپ ءوتىپ، 100 مىڭنان استام ادام قاتىسىپتى وعان.
تامىز ايى الماتىنىڭ جاستار ساياساتىنداعى بەتبۇرىسقا تولى ۋاقىت بولدى. تامىزدىڭ 3ء-ى مەن 12ء-سى ارالىعىندا قالادا بۇكالىلەمدىك جاستار كۇنىنە ورايلاستىرىلعان جاستاردىڭ ALMA LOVE دەيتىن ۇلكەن فەستيۆالى ءوتىپ جاتىر. قالانىڭ 8 اۋدانىن قامتيتىن فەستيۆال ون كۇن بويى ءوتىپ، وندا ءارتۇرلى كونسەرتتەر، كۆەستەر مەن ينتەللەكتۋالداردىڭ باتتلى ۇيىمداستىرىلادى. 12 تامىز كۇنى اشىق اسپان استىندا كونسەرت قويادى. مۇندا جاستار تانىمال ارتىستەرمەن ءبىر ساحنادا ونەر كورسەتىپ، كوش باستاپ، ەرىكتى بولىپ قىزمەت ەتكەن ەڭبەگى ءۇشىن ماراپاتتالادى. سوڭىنا تامان كورەرمەندەر «الماتى – مەنىڭ العاشقى ماحابباتىم» دەيتىن جاعى جارىق شوۋدى تاماشالايدى.
ەكىنشى ماڭىزدى كۇن - 18 تامىز. وسى كۇنى الماتى رەسمي تۇردە تۇركى الەمىنىڭ جاستار استاناسى مارتەبەسىنە يە بولادى. تۇركى مەملەكەتتەرى ۇيىمىنىڭ شەشىمىمەن بەرىلگەن بۇل اتاق - قالانىڭ جاستار ساياساتى سالاسىنداعى جۇيەلى ءارى اۋقىمدى جۇمىسىن مويىنداعانى. سالتاناتتى ءراسىم اياسىندا تۇركى الەمى ەلدەرىنىڭ جاستار دەلەگاسيالارى قاتىساتىن ۇلكەن مادەني فەستيۆال وتەدى. قوناقتار كونسەرتتى تاماشالاپ، VR-كۇيدى تىڭداپ، ەتنو-باتتلداردى، ستارتاپ-ايماقتاردى، ينتەراكتيۆتى الاڭداردى كورىپ، شەبەرلىك ساباعىنا قاتىسادى. ءىس-شارانىڭ ەڭ قىزىقتى ساتىندە - الماتىنى جاستار ىنتىماقتاستىعى مەن يدەيانىڭ ورتالىعى دەپ تانيتىن سيمۆوليكالىق كىلت تابىس ەتەدى.
بۇل قالانى جاڭا جوبالارعا ىنتالاندىراتىن پلاتفورما، حالىقارالىق بايلانىستاردى نىعايتىپ، مادەنيەت الماسۋدى كەڭەيتە تۇسەتىن زور مۇمكىندىك. جاستاردى ساياساتقا ارالاستىرماي-اق، سولاردىڭ كۇشىمەن قالانى كوركەيتىپ، كرەاتيۆتى كەڭىستىك قۇرۋعا بولاتىنىن الماتى ءىس جۇزىندە دالەلدەدى.