قازاقستاندا ۆيرۋستىق گەپاتيتتەرمەن سىرقاتتانۋدى تومەندەتۋ ماقساتىندا 18 جاستان اسقان ادامداردىڭ اراسىندا ۆ جانە س گەپاتيتتەرىن انىقتاۋعا تولىق سكرينينگ جۇرگىزۋ جوسپارلانۋدا، دەپ حابارلايدى aqshamnews.kz دەنساۋلىق ساقتاۋ مينيسترلىگىنە سىلتەمە جاساپ.
دەنساۋلىق ساقتاۋ ءمينيسترى اقمارال ءالنازاروۆانىڭ اۋرۋلاردى تالداۋ ورتالىعى (CDAF) قورىنىڭ ديرەكتورى دوكتور حومي رازاۆيمەن كەزدەستى.
"ددۇ-نىڭ 2030 جىلعا دەيىنگى ۆيرۋستىق گەپاتيتتەردى جويۋ باعدارلاماسىنىڭ نەگىزگى جانە ماڭىزدى ماقساتتارىنىڭ ءبىرى - ولاردى ۋاقتىلى دياگنوستيكالاۋ بولىپ تابىلادى"، - دەپ جازىلعان حابارلامادا.
ۆ جانە س ۆيرۋستىق گەپاتيتتەرى نەگىزىنەن جاسىرىن (اسيمپتوماتيكالىق) بولعاندىقتان، 65% جاعدايدا ولار سيرروزدىڭ نەمەسە باۋىر وبىرىنىڭ دامۋىمەن اياقتالادى، بۇل ءوز كەزەگىندە جۇقتىرعان حالىقتىڭ ولىمىنە جانە مۇگەدەكتىگىنە اكەلەدى. سوندىقتان ينفەكسيا تاسىمالداۋشىلارىن ەرتە ساتىسىندا انىقتاۋدى جانە ەمدەۋدى قامتاماسىز ەتۋ ماڭىزدى، ويتكەنى ولار اينالاسىنداعىلار ءۇشىن ۆيرۋستىق گەپاتيت كوزى بولىپ تابىلادى.
پيلوتتىق باعدارلامانىڭ ناتيجەلەرى بويىنشا قازاقستاندا ءتيىمدى دياگنوستيكالىق شەشىمدەردىڭ كومەگىمەن 18 جاستان اسقان ادامداردىڭ اراسىندا ۆ جانە س ۆيرۋستىق گەپاتيتتەرىن انىقتاۋعا ارنالعان جالپى سكرينينگتى باستاۋ تۋرالى شەشىم قابىلداندى.