18-29 قىركۇيەك ارالىعىندا مارافونشىلار ەلوردادان تۇركىستان قالاسىنا دەيىن 1200 شاقىرىمنان اسا قاشىقتىقتى باسىپ وتەدى.
مادەنيەت جانە سپورت ءمينيسترى داۋرەن ابايەۆ ەلىمىزدە «ۇلى دالا جورىعى» اتتى تۇڭعىش رەسپۋبليكالىق ات مارافون-بايگەسى وتەتىنى تۋرالى بەينەۇندەۋ جاسادى، دەپ حابارلايدى Almaty-akshamy.kz مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.
«ۇلى دالا جورىعى» – ەلىمىزدىڭ 6 ايماعىن (نۇر-سۇلتان قالاسى، اقمولا، قاراعاندى، ۇلىتاۋ، قىزىلوردا، تۇركىستان وبلىستارى) قامتيتىن تۇڭعىش جالپىرەسپۋبليكالىق ات مارافونى.
مارافون قازاقستان رەسپۋبليكاسى مادەنيەت جانە سپورت مينيسترلىگى قولداۋىمەن جانە The Great Steppe Tour قوعامدىق قورى مەن Altyn Qyran Foundation قوعامدىق قورىنىڭ ۇيىمداستىرۋىمەن وتەدى.
الەمدىك تاجىريبەدە تەڭدەسى جوق بۇل مارافون ۇلى دالانى مەكەندەگەن كوشپەندى حالىقتىڭ مۇراسى رەتىندە شاباندوز مادەنيەتىن قازاقستان برەندى رەتىندە قالىپتاستىرۋعا نەگىز بولادى. بۇعان قوسا، مارافون وتاندىق تۋريزم مەن ۇلتتىق سپورت سالاسىن دامىتۋعا تىڭ سەرپىن بەرەدى.
جوبانىڭ ماقساتى - قازاقستانمەن تىكەلەي بايلانىستى تانىمال برەند قۇرۋ جانە ۇلتتىق مادەنيەتتى حالىقارالىق ارەنادا ىلگەرىلەتۋ، جاستاردى ۇلتتىق مادەنيەت پەن تاريحتى زەردەلەۋگە باۋلۋ، سپورتتاعى شەبەرلىك پەن توزىمدىلىك قۇندىلىقتارىن دارىتۋ.
17 قىركۇيەكتە نۇر-سۇلتان قالاسىنىڭ «قازانات» يپپودرومىندا 100 شاباندوزدىڭ قاتىسۋىمەن مارافوننىڭ سالتاناتتى اشىلۋى بولادى.
18-29 قىركۇيەك ارالىعىندا مارافونشىلار ەلوردادان تۇركىستان قالاسىنا دەيىن 1200 شاقىرىمنان اسا قاشىقتىقتى باسىپ وتەدى.
مارافون 100 شاقىرىمدىق 12 ساتىعا بولىنگەن. ەلىمىزدىڭ ءاربىر وڭىرىنەن مارافونعا 1 كوماندادان قاتىسادى. مارافونعا قاتىسۋشىلارعا ۇلى دالا رۋحىن سەزىنۋگە جانە تۇركىلەردىڭ كيەلى جەرلەرى – جوشى حان، الاشا حان كەسەنەلەرى، سونداي-اق قازاق حاندىعىنىڭ العاشقى استاناسى سوزاق قالاسى پەن تۇركى رۋحانياتىنىڭ بەسىگى تۇركىستان قالاسى سياقتى تاريحي ورىندارعا، ازىرەت-سۇلتان كەسەنەسىنە زيارات جاساۋعا مۇمكىندىك تۋادى.
سوڭعى مەجە – تۇركىستان قالاسىنا دەيىن ەڭ قىسقا ۋاقىت ىشىندە جەتكەن كوماندا مۇشەلەرى باس جۇلدە – «ۇلى دالا ساربازى» اتاعى مەن 30 000 000 تەڭگە كولەمىندەگى جۇلدەمەن ماراپاتتالادى. 2ء-شى جانە 3ء-شى ورىن يەگەرلەرى سايكەسىنشە 20 000 000 تەڭگە جانە 15 000 000 تەڭگە جۇلدەلەرىمەن ماراپاتتالادى.
جارىس بارىسىندا بارلىق قاتىسۋشىلار دەمالىس ورىندارى، ازىق-تۇلىكپەن جانە قاجەتتى مەديسينالىق كومەكپەن قامتاماسىز ەتىلەدى.
بۇدان بولەك، ب ا ق وكىلدەرى ءۇشىن مارافون اياسىندا ارنايى «ۇلى دالا جارشىسى» كوشپەندىلەر پرەسس-تۋرى وتكىزىلەدى. ىرىكتەۋدەن وتكەن قاتىسۋشىلار مارافوننىڭ باعىتى بويىنشا ءجۇرىپ ءوتىپ، ۇلى دالانىڭ مادەني تۇرمىسىنا قانىعادى، ورتالىق جانە وڭتۇستىك قازاقستاننىڭ گەوگرافياسى، ەكونوميكاسى، توپونيميكاسى ت.ب جايلى قۇندى اقپارات الادى.
قوسىمشا اقپاراتتى qazanat.kz سايتىنان بىلۋگە بولادى.