ورتالىق كوممۋنيكاسيالار قىزمەتىنىڭ الاڭىندا سۋ رەسۋرستارى جانە يرريگاسيا مينيسترلىگى سۋ رەسۋرستارىن رەتتەۋ، قورعاۋ جانە پايدالانۋ كوميتەتىنىڭ ءتوراعاسى سەيىلبەك نۇرىمبەتوۆ سۋ نىساندارىن قورعاۋ شارالارى، زاڭسىز سۋ الۋ فاكتىلەرىمەن كۇرەس ناتيجەلەرى جانە سۋ تاسقىنىنا قارسى ءىس-شارالار جونىندە ايتتى، - دەپ حابارلايدى Aqshamnews.kz.
الداعى سۋ تاسقىنى كەزەڭىنە دايىندىق شەڭبەرىندە كوميتەتتىڭ باسسەيندىك سۋ ينسپەكسيالارى گيدروتەحنيكالىق نىسان يەلەرىنە سۋ تاسقىنىن ءقاۋىپسىز وتكىزۋ ءۇشىن قاجەتتى ءىس-شارالاردى جۇرگىزۋ بويىنشا ۇسىنىستار بەرىپ جاتىر. بۇعان رەكونسترۋكسيا، جوندەۋ جۇمىستارى جانە قۇرىلىس-مونتاج جۇمىستارىنا ارنالعان جوبالىق-سمەتالىق قۇجات ازىرلەۋ دە كىرەدى.
قازىرگى ۋاقىتتا 69 گيدروتەحنيكالىق نىساندا مەنشىك يەلەرى رەكونسترۋكسيا، كۇردەلى جانە اعىمداعى جوندەۋ جۇمىستارىن جۇرگىزىپ جاتىر. اباي وبلىسىنداعى شار سۋ قويماسىندا جانە شىمكەنت قالاسىنداعى اقجار سۋ قويماسىندا كۇردەلى جوندەۋ اياقتالدى. اقتوبە، جامبىل جانە باتىس قازاقستان وبلىستارىندا 24 نىسان جوندەلدى.
كۇردەلى كليماتتىق جاعدايلارعا قاراماستان، 2025 جىلعى ۆەگەتاسيا كەزەڭىنىڭ قورىتىندىسى كورسەتكەندەي، ەل بويىنشا جالپى 1،2 ملن گەكتار ەگىستىك القاپ سۋارىلىپ، سۋ الۋ كولەمى 11 ملرد تەكشە مەتردەن استى. بۇل كولەمنىڭ 98%-ى الماتى، جامبىل، قىزىلوردا، تۇركىستان جانە جەتىسۋ وبلىستارىنا تيەسىلى. قازىرگى ۋاقىتتا ەلىمىزدىڭ وڭتۇستىگىندەگى سۋ قويمالارى سۋ جيناۋ رەجيمىندە جۇمىس ىستەپ تۇر.
جىل باسىنان بەرى سۋدىڭ «قارا نارىعىمەن» كۇرەس ماقساتىندا باسسەيندىك سۋ ينسپەكسيالارى 463 تەكسەرىس جۇرگىزىپ، ونىڭ ناتيجەسىندە زاڭبۇزۋشىلىقتى جويۋ بويىنشا 143 نۇسقاما بەرىلدى. سونداي-اق 801 اكىمشىلىك ايىپپۇل سالىندى. ونىڭ ىشىندە 346-سى ءوز بەتىمەن سۋ پايدالانعانى ءۇشىن.
جاڭا سۋ كودەكسىن ىسكە اسىرۋ ماقساتىندا كوميتەت 22 نورماتيۆتىك-قۇقىقتىق اكت ازىرلەدى. جەرگىلىكتى اتقارۋشى ورگاندارمەن بىرلەسىپ، ەلدى مەكەندەردىڭ اۋماعىنداعى سۋ قورعاۋ ايماقتارى مەن بەلدەۋلەرىن بەلگىلەۋ جونىندەگى ءىس-شارالار جوسپارى بەكىتىلدى. قازىرگى تاڭدا باسسەين ينسپەكسيالارى مەن اكىمدىكتەر سۋ قورعاۋ ايماقتارى مەن بەلدەۋلەرى بەلگىلەنۋى قاجەت جەرۇستى سۋ نىساندارىنىڭ ءتىزىمىن جاساپ جاتىر. ءتيىستى جوبالاردى ازىرلەۋ باستالدى.
بۇدان بولەك، 2025-2027 جىلدارعا ارنالعان ەلدى مەكەندەرگە جاقىن ورنالاسقان وزەندەردىڭ سۋ تاسقىنى ءقاۋپى جوعارى ۋچاسكەلەرىن قالپىنا كەلتىرۋ بويىنشا ءىس-شارالار جوسپارى ازىرلەنىپ، بەكىتىلدى. تازالاۋ جانە تەرەڭدەتۋ ءۇشىن قازاقستاننىڭ ون وبلىسىندا جالپى ۇزىندىعى 815 شاقىرىم بولاتىن 51 وزەن مەن ءبىر كولدىڭ ۋچاسكەلەرى ايقىندالدى.
كوميتەت مەملەكەتتىك سۋ كاداسترىن ازىرلەپ، جاريا ەتتى. «سۋ رەسۋرستارىنىڭ اقپاراتتىق-تالداۋ ورتالىعى» كەاق-مەن بىرلەسىپ سۋ رەسۋرستارىنىڭ ۇلتتىق اقپاراتتىق جۇيەسىنىڭ ەسەپتەرىن تولتىرۋ جانە قالىپتاستىرۋ بويىنشا جۇمىس جۇرگىزىلىپ جاتىر.
«باسسەيندىك سۋ ينسپەكسيالارىنىڭ ماتەريالدىق-تەحنيكالىق بازاسى جاقسارتىلدى. ارنايى تەحنيكا مەن اۆتوكولىك پاركى جاڭارتىلدى. مينيسترلىك پەن گەرمانيانىڭ حالىقارالىق ىنتىماقتاستىق قوعامى اراسىنداعى كەلىسىم اياسىندا جاڭا كومپيۋتەرلىك تەحنيكا الىندى. ون اكىمشىلىك عيماراتتا جوندەۋ جۇمىستارى جۇرگىزىلدى. بۇل اتقارىلعان شارالار ينسپەكسيالاردىڭ ءتيىمدى جۇمىس ىستەۋى مەن ولاردىڭ فۋنكسيالارىن ساپالى ورىنداۋىنا قاجەتتى جاعداي جاسادى»، – دەدى سۋ رەسۋرستارىن رەتتەۋ، قورعاۋ جانە پايدالانۋ كوميتەتىنىڭ ءتوراعاسى سەيىلبەك نۇرىمبەتوۆ.