ماسكات كورولدىك وپەرا تەاترىندا رولان پەتيدىڭ «كوپپەليا» بالەتى ساحنالاندى. ومان تاراپىنىڭ ارنايى شاقىرۋىمەن بارعان «استانا وپەرا» تەاترى كورەرمەنگە جوعارى دەڭگەيدەگى كاسىبي ورىنداۋشىلىق شەبەرلىگىن پاش ەتتى.
ەكى كۇن ىشىندە بالەتتى ەكى مىڭنان استام كورەرمەن تاماشالادى. ماەسترو رۋسلان بايمۋرزين جەتەكشىلىك ەتكەن وركەستر قويىلىمنىڭ دراماتۋرگياسىن تەرەڭدەتىپ، اسەرلى مۋزىكالىق اتموسفەرا قالىپتاستىردى.
وماندىق ونەرسۇيەر قاۋىم مەن شەتەلدىك مەيماندار قازاقستاندىق ترۋپپانىڭ ونەرىن زور ىقىلاسپەن قابىلدادى. ولار ورىنداۋشىلىقتىڭ دالدىگىن، ارتيستتەردىڭ ايقىن وبراز جاساۋىن، ءانسامبلدىڭ ءمىنسىز ۇيلەسىمىن ەرەكشە اتاپ ءوتتى. ماسكاتتىق كورەرمەندەردىڭ ءبىرى قويىلىمدى «سيرەك كەزدەسەتىن پلاستيكا مەن جوعارى كاسىبي شەبەرلىكتىڭ ۇيلەسۋى» دەپ باعالاپ، جەتەكشى سوليستەردىڭ ويىن-ورنەگى «تولىققاندى ۇيلەسىم اسەرىن سىيلاعانىن» جەتكىزدى.
گاسترولدەردىڭ تابىستى وتۋىنە بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆانىڭ ەڭبەگى ايرىقشا ۇلەس قوستى. پەداگوگتار مەن رەپەتيتورلاردىڭ جۇيەلى دايىندىعىنىڭ ارقاسىندا «استانا وپەرا» ءوزىنىڭ ورىنداۋشىلىق مەكتەبىن قالىپتاستىرىپ قانا قويماي، رەپەرتۋارلىق ساياساتىندا بيىك كاسىبي تالاپ پەن بىرىزدىلىكتى تۇراقتى تۇردە ۇستانىپ كەلەدى.