قازاقستاندا جانۋارلاردى سيركتە قولدانۋعا تىيىم سالۋ جانە زووپاركتەردى كەزەڭ-كەزەڭىمەن جانۋارلارعا ارنالعان پانالاۋ ورىندارىنا نەمەسە سانكتۋارييلەرگە اينالدىرۋ تۋرالى ونلاين-پەتيسيا پايدا بولدى، - دەپ حابارلايدى Aqshamnews.kz.
پەتيسيا اۆتورلارىنىڭ ايتۋىنشا، مۇنداي مەكەمەلەر كوڭىل كوتەرۋ قۇرالى ەمەس، جانۋارلاردى قورعاۋ جانە وڭالتۋ ورتالىقتارىنا اينالۋى ءتيىس.
«جانۋارلاردى ۇيرەتۋ مەن ولاردى سيركتە ويناتۋعا تولىق تىيىم سالۋدى، جاڭا زووپاركتەردىڭ قۇرىلىسىن توقتاتۋ تۋرالى موراتوريي ەنگىزۋدى، 3–5 جىل ىشىندە جانۋارلاردى ارنايى وتاندىق جانە حالىقارالىق پريۋتتارعا تاپسىرۋدى، سونىمەن قاتار سيرك پەن زووپارك قىزمەتكەرلەرىن قايتا دايارلاۋعا قولداۋ كورسەتۋدى سۇرايمىز»، — دەلىنگەن پەتيسيا ماتىنىندە.
ينيسياتورلار الەمدىك تاجىريبەگە سۇيەنەدى: ەۋروپانىڭ كوپتەگەن ەلدەرىندە جابايى جانۋارلاردىڭ سيركتە ونەر كورسەتۋى الدەقاشان تىيىم سالىنعان، ال ءداستۇرلى زووپاركتەردى بىرتىندەپ گۋمانيستىك ۇلگىدەگى مەكەمەلەر الماستىرىپ جاتىر.
قوعام بەلسەندىلەرى جانۋارلاردىڭ ەركىندىگىن شەكتەيتىن جانە ولاردى تابيعي مەكەنىنەن اجىراتاتىن ويىن-ساۋىق يندۋسترياسىنا قوعام تاراپىنان قايتا باعا بەرىلەتىن ۋاقىت جەتتى دەپ ەسەپتەيدى.