«قازىرگى ۋاقىتتا قازاق ونكولوگيا ينستيتۋتىندا قاتەرلى ىسىكتەردى حيرۋرگيالىق ەمدەۋدىڭ جاڭا ادىستەرى ەنگىزىلۋدە. بۇل - ونكوۋرولوگيا، ونكوگينەكولوگيا جانە ءىشتىڭ ونكولوگياسىنداعى روبوتتى حيرۋرگيا جانە ونكولوگيالىق دياگنوز كەزىندە قاڭقا سۇيەكتەرىنىڭ 3D پروتەزدەۋى. قازاقستاندىق تيتاننان 3D-يمپلانتتاردى ازىرلەۋ بويىنشا جۇمىستار جۇرگىزىلۋدە. باس جانە مويىن ىسىكتەرىنە ميكروحيرۋرگيالىق وپەراسيا جاساۋ جوسپارلانۋدا»، – دەدى سپيكەر.
ول ەلدە ساۋلەلىك تەراپيانى قولدانا وتىرىپ، ونكولوگيالىق ناۋقاستارعا كورسەتىلەتىن كومەكتىڭ دامىپ كەلە جاتقانىن ايتتى. 2024 جىلى ەلىمىزدىڭ 5 وڭىرىندە قوسىمشا 6 جاڭا جەلىلىك ۇدەتكىش پايدالانۋعا بەرىلدى. 2025 جانە 2026 جىلدارى ەل بويىنشا تاعى 10 جەلىلىك ۇدەتكىش ورناتۋ جوسپارلانىپ وتىر. ءتورت زاماناۋي سىزىقتىق ۇدەتكىشى بار ۇلتتىق عىلىمي ونكولوگيالىق ورتالىق جۇمىس ىستەي باستادى. وسىلايشا، 2028 جىلعا قاراي ساۋلەلىك تەراپيانى جۇرگىزۋگە ارنالعان زاماناۋي جابدىقتارمەن جاراقتاندىرۋ 85%-دى قۇرايدى، ال ساۋلەلىك تەراپيا قاجەتتىلىكتىڭ 80%-ىن قامتيدى.
سونىمەن قاتار «دارىگەر — ماج — دەنساۋلىق ساقتاۋ مينيسترلىگىنىڭ اقپاراتتىق جۇيەسى» مودەلى جەتىلدىرىلىپ جاتىر. بۇل پاسيەنت تۋرالى بۇكىل مالىمەتتى اقپاراتتىق جۇيەدە — كۇدىك تۋعىزۋدان جانە دياگنوزدى راستاۋدان باستاپ، ەمدەۋ تاكتيكاسى بويىنشا كوپسالالى توپتىڭ شەشىمىنە، ەمدەۋ جوسپارىنىڭ ورىندالۋىنا جانە اۋرۋدىڭ ءورشۋى جاعدايىندا ەسىرتكى انالگەتيكتەرىن تاعايىنداۋعا دەيىن ءتيىمدى باقىلاۋعا مۇمكىندىك بەرەدى.
ەسكە سالا كەتەيىك، بۇعان دەيىن ەلىمىزدە قاتەرلى ىسىككە شالدىققاندار كوبەيگەنىن، ءبىراق ونكولوگيالىق اۋرۋلاردان بولاتىن ءولىم-جىتىم ازايعانىن حابارلاعان ەدىك.