توتەنشە جاعدايلار ءمينيسترى گەنەرال-مايور شىڭعىس ءارىنوۆ ۇكىمەت وتىرىسىندا ەلدەگى ءورت جانە ونەركاسىپتىك قاۋىپسىزدىكتى قامتاماسىز ەتۋ سالاسىنداعى اعىمداعى جاعدايدى، سونداي-اق وندىرىستەگى قىزمەتكەرلەردىڭ جاراقاتتانۋى مەن قازا بولۋ دەڭگەيىن ازايتۋ جونىندەگى شارالارى تۋرالى بايانداما جاسادى.
بيىلعى جىلدىڭ باسىنان باستاپ نىسانداردا 16 مىڭعا جۋىق تەكسەرۋ (15 996) جۇرگىزىلدى، ولاردىڭ ناتيجەسىندە 105 مىڭنان استام بۇزۋشىلىق انىقتالدى، دەپ حابارلايدى aqshamnews.kz.
ءومىر مەن دەنساۋلىققا ءقاۋىپ توندىرەتىن ورەسكەل بۇزۋشىلىقتار ءۇشىن 7 957 نىساننىڭ قىزمەتى توقتاتىلدى، ونىڭ 95%-ى ءورت قاۋىپسىزدىگى سالاسى بويىنشا.
مينيستر نەگىزگى بۇزۋشىلىقتار ءورت اۆتوماتيكاسى جۇيەلەرىنىڭ بولماۋى نەمەسە دۇرىس جۇمىس ىستەمەۋى، وقىتىلماعان قىزمەتكەرلەردى جۇمىسقا جىبەرۋ، سونداي-اق ەۆاكۋاسيالىق شىعۋلاردىڭ بىتەلۋى ەكەنىن اتاپ ءوتتى.
ونەركاسىپتىك قاۋىپسىزدىك سالاسىنا دا باسا نازار اۋدارىلدى. مۇنداي بۇزۋشىلىقتارعا بايلانىستى جۇمىستى توقتاتا تۇرۋ سانى وتكەن جىلمەن سالىستىرعاندا 4،5 ەسە ءوستى (92-دەن 418-گە دەيىن). تەك قاڭتاردان مامىرعا دەيىن 11 اۆاريا جانە 60-تان استام وقيعا تىركەلدى، سالدارىنان 22 قىزمەتكەر زارداپ شەكتى، 15 ادام قازا تاپتى. جازاتايىم وقيعالاردىڭ نەگىزگى سەبەپتەرىنىڭ ءبىرى تەحنيكالىق جابدىقتىڭ توزۋىنىڭ جوعارى دارەجەسى بولىپ قالا بەرەدى.
وسى ماسەلەنى جۇيەلى شەشۋ ءۇشىن مينيسترلىك ءقاۋىپتى وندىرىستىك وبەكتىلەر يەلەرىنىڭ ۆەدومستۆومەن كەلىسۋگە جاتاتىن جاڭارتۋ مەن تەحنيكالىق قايتا جاراقتاندىرۋدىڭ جيىنتىق جوسپارىن جاساۋ مىندەتىن زاڭنامالىق تۇرعىدان بەكىتۋگە باستاماشىلىق جاسادى. ءتيىستى زاڭ جوباسى پارلامەنت سەناتىندا قارالۋدا.
قوسىمشا ءاربىر ءقاۋىپتى وندىرىستىك وبەكتىدە وندىرىستىك باقىلاۋدىڭ دەربەس قىزمەتى قۇرىلاتىن بولادى. مينيسترلىك وسىعان بايلانىستى نورماتيۆتەر ازىرلەيدى، بۇل جەرگىلىكتى جەرلەردە باقىلاۋدى كۇشەيتۋگە مۇمكىندىك بەرەدى.
مەملەكەت باسشىسىنىڭ تاپسىرماسى شەڭبەرىندە سيفرلىق جۇيەلەردى ەنگىزۋدى قوسا العاندا، ونەركاسىپتىك قاۋىپسىزدىك سالاسىنداعى شارالاردى دامىتۋ جوسپارى ىسكە اسىرىلۋدا. قاراعاندى وبلىسىندا پيلوتتىق رەجيمدە كەنشىلەردى پوزيسيالاۋ جانە گازدانۋ مونيتورينگى جۇيەلەرى تەستىلەۋدەن وتۋدە، بۇل تج-عا جەدەل دەن قويۋعا مۇمكىندىك بەرەدى.
مينيستر ءسوزىن قورىتىندىلاي كەلە، مينيسترلىك بۇدان بىلاي دا زاماناۋي تاسىلدەردى ەنگىزىپ، قاداعالاۋدى كۇشەيتە وتىرىپ، وندىرىستىك جاراقاتتانۋدى جانە جۇمىسكەرلەردىڭ قازا بولۋىن ازايتۋ جونىندەگى مەملەكەتتىك ساياساتتى دايەكتى تۇردە ىسكە اسىراتىنىن اتاپ ءوتتى.