ماۋسىمنىڭ ءۇشىنشى جەكسەنبىسى – قازاقستاندا اكەلەر كۇنى رەتىندە اتالىپ وتەدى. بۇل اتاۋلى كۇن العاش رەت 2023 جىلى رەسمي بەكىتىلدى. مەرەكەنى بەلگىلەۋگە اقپارات جانە قوعامدىق دامۋ مينيسترلىگى باستاماشى بولىپ، بۇل - ەلىمىزدەگى وتباسى ينستيتۋتىن نىعايتۋعا ىقپال ەتەدى دەپ سەندىردى. وسى داتا قارساڭىندا اqshamnews.kz ءتىلشىسى ەلدەگى جالعىزباستى جانە دەكرەتتەگى اكەلەر جايلى قىزىقتى دەرەكتەردى ۇسىنادى.
قازاقستاندا 52 مىڭ جالعىزباستى اكە بار
2022 جىلعى حالىق ساناعىنىڭ قورىتىندىسى بويىنشا، قازاقستاندا 18 جاسقا دەيىنگى بالاسى بار 476 مىڭ جالعىزباستى اتا-انا تىركەلگەن. ولاردىڭ 52 مىڭى – ەر ازاماتتار. ياعني بۇل – بالا تاربيەسىن جالعىز ءوز موينىنا العان 52 مىڭ اكە. اراسىندا جەسىرلەر دە، اجىراسقاندار دا، ءتىپتى مۇلدە ۇيلەنبەگەندەر دە بار. وكىنىشكە قاراي، ۇلتتىق ستاتيستيكا بيۋروسى 2022 جىلعى قولدا بار كەيىنگى دەرەكتەردى عانا ۇسىندى.
ەلىمىزدە ءبىر ەمەس، ءتورت رەت دەكرەتكە شىققان اكەلەر بار
2025 جىلدىڭ العاشقى 4 ايىندا ەلىمىزدە 863 اكە رەسمي تۇردە دەكرەتتىك جاردەماقى العان. بىلتىر - 477، ال 2023 جىلى 583 اكە بالا كۇتىمىنە بايلانىستى الەۋمەتتىك دەمالىسقا شىققان.
دەكرەتكە شىققان اكەلەردىڭ 65 پايىزى 30 بەن 40 جاس ارالىعىنداعى ازاماتتار. ولار نەگىزىنەن ساۋدا، اۆتوكولىك جوندەۋ، عىلىمي جانە تەحنيكالىق قىزمەت، وڭدەۋ ونەركاسىبى، قۇرىلىس، مەملەكەتتىك باسقارۋ مەن قورعانىس سالالارىندا ەڭبەك ەتەدى. ياعني، بالا تاربيەسى ءۇشىن ۋاقىتشا ەڭبەك ءۇزىلىسىن كوبىنە كاسىبي ورتادا ورنىققان، جۇمىس تاجىريبەسى بار ازاماتتار الادى.
مەملەكەتتىك الەۋمەتتىك ساقتاندىرۋ قورىنىڭ مالىمەتىنشە، بالا كۇتىمىنە بايلانىستى الەۋمەتتىك تولەم الىپ وتىرعان ەر ازاماتتاردىڭ 636-سى بۇل تولەمدى العاش رەت الىپ وتىر. 110 ادام ەكىنشى رەت، 21 ازامات ءۇشىنشى رەت، ال 2 كوپبالالى اكە ءتورتىنشى نەمەسە ودان دا كوپ رەت دەكرەتكە شىققان.
گەوگرافيالىق تۇرعىدا قاراعاندا، دەكرەتتىك دەمالىستاعى اكەلەردىڭ ەڭ كوپ ۇلەسى الماتى (112 ادام)، استانا (106 ادام) جانە جامبىل وبلىسىندا (104 ادام) تىركەلگەن. ال ۇلىتاۋ، باتىس قازاقستان، اباي، قىزىلوردا جانە جەتىسۋ وبلىستارىندا بالا كۇتىمىنە بايلانىستى دەمالىس الاتىن ەر ازاماتتار سانى الدەقايدا از.
تۇل قالعان ەر ادامدار – 130 مىڭنان اسادى
2021 جىلعى مالىمەتكە ساي، ەلىمىزدە 130 مىڭ تۇل ەر ادام بار. بۇل – ومىرلىك سەرىگىنەن ايىرىلعان، ءبىراق كوپ جاعدايدا اكە ءرولىن جالعىز ارقالاپ جۇرگەن ازاماتتار. ال جەسىر قالعان ايەلدەردىڭ سانى - 600 مىڭعا جۋىقتايدى. بۇل كورسەتكىش ەرلەردەن 5 ەسە كوپ.