شانحاي ىنتىماقتاستىق ۇيىمى تۇراقتى دامۋ جىلى جانە بۇۇ ۇيىمداستىرعان دۇنيەجۇزىلىك شىعارماشىلىق جانە يننوۆاسيالىق قىزمەت كۇنى اياسىندا قىتايدىڭ سينداو قالاسىندا شىۇ-عا مۇشە ەلدەردىڭ IV جاستار يننوۆاسيالار جانە كاسىپكەرلىك بايقاۋى ءوتتى. ءىس-شارادا ءوڭىردىڭ عىلىمي جانە ستارتاپ-ورتاسىنىڭ ۇزدىك وكىلدەرى باس قوسىپ، ول جاھاندىق سىن-قاتەرلەردى شەشۋگە باعىتتالعان ناعىز وزىق يدەيالار سورەسىنە اينالدى.
بايقاۋدىڭ ماقساتى – جاس كاسىپكەرلەردى ىلگەرىلەتۋ عانا ەمەس، يننوۆاسيالىق ىنتىماقتاستىقتىڭ مەملەكەتارالىق ەكوجۇيەسىن قالىپتاستىرۋ، ونىڭ باستى مەجەسى - تۇراقتى دامۋ، سيفرلاندىرۋ جانە ەكولوگيالىق شەشىمدەر. قازاقستاننىڭ قارىمدى وكىلدىگى فورۋمنىڭ جارقىن اكسەنتىنە اينالدى. حالىقارالىق جاسىل تەحنولوگيالار جانە ينۆەستيسيالىق جوبالار ورتالىعىنىڭ (حجتيجو) بازاسىندا GCIP-Kazakhstan اكسەلەراسيالىق باعدارلاماسىنان وتكەن ءۇش ستارتاپ فيناليستەردىڭ قاتارىنا ىلىكتى جانە قازىلار القاسىنىڭ ناگرادالارىمەن ماراپاتتالدى.
- ءۇشىنشى ورىندى «ءوزىن-وزى اقتايتىن دەكاربونيزاسيا جانە سارقىندى سۋلاردى تازارتۋ تەحنولوگياسى» – ونەركاسىپتىك ەكولوگيا سالاسىنداعى پراكتيكالىق شەشىم ازىرلەمەسىمەن Science and Technology Water Center جوباسى يەلەندى.
- Smart Energy Solutions ەنەرگەتيكالىق جۇيەلەردى سيفرلاندىرۋعا باعىتتالعان AMI Data Analytics يننوۆاسيالىق پلاتفورماسى ءۇشىن ۇزدىك جەتىستىكتەرى ءۇشىن سىيلىق الدى.
- ەلەكتروندىق قالدىقتاردان اسا ماڭىزدى ماتەريالداردى قالپىنا كەلتىرۋمەن اينالىساتىن Kaz-REEcycling جوباسى سيكلدىك ەكونوميكاعا پەرسپەكتيۆالى ءتاسىلدى ۇسىنا وتىرىپ، فيناليست بولدى.
GCIP-Kazakhstan مەن حجتيجو: جاھاندىق اۋقىمداعى جەرگىلىكتى دامۋ.
قازاقستاندىق جوبالاردىڭ وسىنداي بەدەلدى حالىقارالىق بايقاۋعا قاتىسۋى وتاندىق cleantech-سەكتوردىڭ جەتىلگەندىگى مەن ورشىلدىگىن كورسەتەدى. جاھاندىق ارىپتەستەردىڭ قولداۋىمەن حجتيجو جۇزەگە اسىرىپ جاتقان GCIP-Kazakhstan باعدارلاماسى ءبىر مەزگىلدە ەكونوميكالىق وسۋگە، ەكولوگيالىق تۇراقتىلىق پەن تەحنولوگيالىق جاڭعىرتۋعا ىقپال ەتەتىن شەشىمدەردى قولداۋ، ماسشتابتاۋ جانە نارىققا شىعارۋ سياقتى ءوزىنىڭ نەگىزگى ميسسياسىن ورىنداپ جاتىر.
قابىلداۋشى تاراپتىڭ اتىنان قاتىسۋشىلاردى سينداو حالىق جينالىسىنىڭ تۇراقتى كوميتەتى ءتوراعاسىنىڭ ورىنباسارى حان شوۋسين جانە قحر عىلىم جانە تەحنولوگيا مينيسترلىگىنىڭ وكىلدەرى قارسى الدى. شىۇ حاتشىلىعىنىڭ كەڭەسشىسى قايرات بايتاسوۆ بايقاۋداعى ءاربىر جوبا – جاي عانا بيزنەس-يدەيا ەمەس، XXI عاسىردىڭ سىن-قاتەرلەرىنە: جاساندى ينتەللەكتىدەن باستاپ تۇراقتى ەنەرگەتيكاعا دەيىنگى ناقتى جاۋاپ ەكەنىن ەرەكشە اتاپ ءوتتى.
حجتيجو كەاق باسقارما ءتوراعاسىنىڭ مىندەتىن اتقارۋشى ساكەن قالقامانوۆتىڭ ايتۋىنشا، «قازاقستان شىۇ ايماعىنىڭ ورتاق عىلىمي-يننوۆاسيالىق كەڭىستىگىن قالىپتاستىرۋداعى ماڭىزدى ءرولىن راستاپ وتىر. بۇگىندە ەل تەك تەحنولوگيالىق شەشىمدەردى تۇتىنۋشى عانا ەمەس، سونىمەن قاتار ەكولوگيالىق ماعىنا مەن قۇندىلىقتاردى ەكسپورتتاۋشى رەتىندە ەكونوميكانى ينتەللەكت، كاسىپكەرلىك جانە ارىپتەستىك ارقىلى تۇرلەندىرىپ كەلەدى».
انىقتاما:
Global Cleantech Innovation Programme (GCIP)-Kazakhstan –تازا تەحنولوگيالار سالاسىنداعى جاھاندىق يننوۆاسيالىق باعدارلاما – دۇنيەجۇزىلىك ەكولوگيالىق قور (دەق) مەن بىرىككەن ۇلتتار ۇيىمىنىڭ ونەركاسىپتىك دامۋ ۇيىمىنىڭ (يۋنيدو) نەگىزگى فلاگماندىق باستامالارىنىڭ ءبىرى بولىپ تابىلادى. باعدارلاما ەكولوگيالىق تازا تەحنولوگيالار سالاسىنداعى يننوۆاسيالار مەن كاسىپكەرلىكتى دامىتۋعا باعىتتالعان. GCIP باعدارلاماسى پەرسپەكتيۆالى ستارتاپتاردى انىقتاۋ، ولاردى قولداۋ، دامىتۋ، كوممەرسيالاندىرۋ جانە نارىققا شىعارۋ بويىنشا پراكتيكالىق قۇرالداردى ۇسىنادى. سونداي-اق، باعدارلاما قازاقستاندا تومەن كومىرتەكتى جانە رەسۋرستى ۇنەمدەيتىن دامۋ باعىتىن ىلگەرىلەتۋ ماقساتىندا حالىقارالىق ۇزدىك تاجىريبەلەردى ەنگىزۋدى كوزدەيدى.