قازاقستاندا قانشا دارىگەر بار؟ دەنساۋلىق ساقتاۋ سالاسىنداعى ەل بىلمەيتىن دەرەكتەر

ماۋسىمنىڭ ءۇشىنشى جەكسەنبىسى - مەديسينا قىزمەتكەرلەرى كۇنى. كاسىبي مەرەكە قارساڭىندا Aqshamnews.kz ءتىلشىسى  ەلىمىزدەگى دەنساۋلىق ساقتاۋ سالاسىنا قاتىستى جۇرت بىلمەيتىن دەرەكتەردى ۇسىنادى.

قازاقستاندا قانشا مەدقىزمەتكەر بار؟

2025 جىلدىڭ 1 قاڭتارىنداعى مالىمەتكە سايكەس، قازاقستاندا 275 107 مەديسينا قىزمەتكەرى تىركەلگەن. ونىڭ ىشىندە 83 379 – دارىگەر، 191 728 – ورتا مەديسينا قىزمەتكەرى (مەيىرگەر، فەلدشەر ت.ب.). دەنساۋلىق ساقتاۋ مينيسترلىگىنىڭ مالىمەتىنشە، بۇلاردىڭ اراسىندا ەڭ كوپ جۇكتەمەمەن جۇمىس ىستەيتىن دارىگەرلىك ماماندىقتار جالپى پراكتيكا دارىگەرلەرى جانە تەراپيەۆتەر ەكەن.

مەديسينا ماماندىقتارىنا سۇرانىس قانداي؟

سوڭعى بەس جىلدا مەديسيناعا قىزىعۋشىلىق ارتقانى بايقالادى. 1-كۋرسقا قابىلدانعان ستۋدەنتتەر سانى:

• 2020–2021 وقۋ جىلى – 8 351

• 2021–2022 – 10 846

• 2022–2023 – 12 844

• 2023–2024 – 16 396

• 2024–2025 – 17 490

قازىرگى تاڭدا ەلىمىزدە 71 754 ستۋدەنت بولاشاق دارىگەر رەتىندە ءبىلىم الىپ جاتىر. الايدا 2024 جىلدىڭ قورىتىندىسى بويىنشا مەديسينا ماماندارىنىڭ تاپشىلىعى 8217،25 شت.بىرلىك قۇرادى (ونىڭ ىشىندە دارىگەرلەر – 3986، ومق – 4231،25). ەڭ ۇلكەن تاپشىلىق كەلەسى جالپى پراكتيكا دارىگەرلەرى (255،25)، تەراپيەۆتتەر (252،75)، انەستەزيولوگتار-رەانيماتولوگتار (230،25)، اكۋشەر-گينەكولوگتار (183،75)، حيرۋرگتار (164،5)، پەدياترلار (150)، دارىگەر-زەرتحاناشىلار (101،5) بويىنشا بايقالعان. 

ەڭ كوپ جانە ەڭ از جالاقى الاتىن مەدقىزمەتكەرلەر

مەديسينا سالاسىنىڭ قىزمەتكەرلەرى اراسىندا ەڭ جوعارى جانە ەڭ از جالاقى الاتىندار كىمدەر ەكەنىن سۇراتقان بولاتىنبىز. الايدا ۆەدومستۆو بۇل سۇراققا ناقتى ساندارمەن جاۋاپ بەرمەدى. سەبەبى، دارىگەر جالاقىسىن تاعايىنداۋ جۇيەسى كۇردەلى. ول:

• دارىگەردىڭ بىلىكتىلىگىنە،

• ىستەيتىن جۇمىس كولەمى مەن كۇردەلىلىگىنە،

• مەنشىك نىسانىنا،

• جانە ەڭبەك شارتىنا بايلانىستى بەلگىلەنەدى.

مەملەكەتتىك مەكەمەلەردەگى ەڭبەكاقى ق ر ۇكىمەتىنىڭ قاۋلىسىنا ساي بەكىتىلەدى. ال شارۋاشىلىق جۇرگىزۋ قۇقىعىنداعى مەكەمەلەردە جالاقىنى مەكەمەنىڭ ءوزى بەلگىلەيدى. سوندىقتان ءبىر سالانىڭ ەكى ءتۇرلى مەكەمەسىندە جۇمىس ىستەيتىن مامانداردىڭ ايلىعى ايتارلىقتاي ايىرماشىلىق كورسەتۋى مۇمكىن.

كاسىبي قاتەلىگى ءۇشىن قانشا دارىگەر ءىستى بولدى؟

سوڭعى ءۇش جىلدا مەديسينالىق قاتەلىككە بايلانىستى 2022 جىلى – 6، 2023 جىلى – 5، 2024 جىلى – 10 ءىس قارالعان.  بۇل ىستەردىڭ بارلىعى تارتىپتىك، سوتتىق نەمەسە اكىمشىلىك جاۋاپكەرشىلىككە تارتۋ بويىنشا قارالعان.