ادىلەت مينيسترلىگىنىڭ مالىمەتىنشە، 2025 جىلى اليمەنت تولەمەيتىن بورىشكەرلەردىڭ باسىم كوپشىلىگى – ەر ادامدار. مينيسترلىك اqshamnews.kz رەداكسياسىنا اليمەنت ءوندىرۋ ءىسىنىڭ كولەمى، بەرەشەك سوماسى جانە بورىشكەرلەرگە قولدانىلاتىن شارالار تۋرالى تولىق دەرەك ۇسىندى.
كەيىنگى 3 جىل ىشىندە اليمەنت ءوندىرۋ تۋرالى قانشا ءىس تىركەلگەن؟
قازاقستان رەسپۋبليكاسى ادىلەت مينيسترلىگىنىڭ ماجبۇرلەپ ورىنداتۋ كوميتەتى اليمەنتتەردى ءوندىرۋ ىسىنە قاتىستى جاڭا دەرەكتەردى جاريالادى. رەسمي اقپاراتقا سايكەس،
- 2023 جىلى سوت ورىنداۋشىلارىنىڭ وندىرىسىندە اليمەنت ءوندىرۋ تۋرالى 326 مىڭ ءىس بولعان.
- بۇل كورسەتكىش 2024 جىلى 343 مىڭعا جەتكەن.
- ال 2025 جىلدىڭ باسىنان بەرى 317 905 اتقارۋشىلىق ءىس تىركەلدى.
اليمەنتكە بايلانىستى ىستەردىڭ ىشىندە 13 مىڭنان اسا نەمەسە شامامەن 4 پايىزى پروبلەمالىق دەپ تانىلعان. بۇل ىستەر بويىنشا بەرەشەك كولەمى - 18،5 ملرد تەڭگە.
قانشا انا اليمەنت تولەۋدەن جالتارىپ ءجۇر؟
2025 جىلعى 19 ماۋسىمداعى جاعداي بويىنشا اليمەنت تولەمەگەن بورىشكەرلەردىڭ جالپى سانى 247 795 ادام.
- ونىڭ 240 420-سى (97 پايىزى) – ەر ادامدار،
- ال 7 375ء-ى (3 پايىزى) – ايەلدەر.
كوميتەت اليمەنت تولەمەيتىن ەرلەر مەن ايەلدەردىڭ اراقاتىناسى بويىنشا جەكە ستاتيستيكا جۇرگىزبەيتىنىن اتاپ ءوتتى.
اليمەنتتەن جالتارعان قانشا ادام سوتتالدى؟
2025 جىلدىڭ العاشقى التى ايدا اۋماقتىق ادىلەت ورگاندارى 2 615 بورىشكەردى اكىمشىلىك جاۋاپكەرشىلىككە تارتقان. سونىمەن قاتار، قازاقستان رەسپۋبليكاسى قىلمىستىق كودەكسىنىڭ 139-بابى بويىنشا ىشكى ىستەر ورگاندارىنا 528 ۇسىنىس جولدانعان. سونىڭ ناتيجەسىندە ءبىرىڭعاي تىزىلىمدە 429 ءىس تىركەلىپ، ونىڭ 315ء-ى سوتقا جولداندى، ال 254 ادام سوتتالعان.
بورىشكەرلەرگە قانداي جازا قولدانىلادى؟
زاڭ بويىنشا اليمەنت بويىنشا بەرەشەگى ءۇش ايدان اسقان بورىشكەردىڭ بانكتەگى قاراجاتى مەن مۇلكىنە تىيىم سالىنىپ، شەتەلگە شىعۋىنا شەكتەۋ قويىلۋى مۇمكىن. سونداي-اق، بورىشكەردىڭ مۇلكىن ءوندىرىپ الۋ شارالارى قولدانىلادى. اتقارۋشىلىق قۇجاتتى ورىنداماۋ قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 669-بابىنا سايكەس اكىمشىلىك جاۋاپكەرشىلىككە، ال قىلمىستىق كودەكستىڭ 139-بابى بويىنشا قىلمىستىق جاۋاپكەرشىلىككە اكەلەدى.
قىلمىستىق جاۋاپكەرشىلىككە تارتىلعان ادامعا 600 ساعاتقا دەيىن قوعامدىق جۇمىستار، ەكى جىلعا دەيىن بوستاندىعىن شەكتەۋ نەمەسە باس بوستاندىعىنان ايىرۋ جازاسى قولدانىلۋى مۇمكىن.