ءماجىلىس قىلمىستىق كودەكس پەن قىلمىستىق-پروسەستىك كودەكسكە تولىقتىرۋلار ەنگىزۋ تۋرالى زاڭ جوباسىن ءبىرىنشى وقىلىمدا ماقۇلدادى، - دەپ حابارلايدى Aqshamnews.kz.
بۇل قۇجاتتى دەنساۋلىق ساقتاۋ قىزمەتكەرلەرىنە فيزيكالىق زورلىق-زومبىلىق پەن قاتىگەزدىك كورسەتكەنى ءۇشىن جازانى كۇشەيتۋ تۋرالى مەملەكەت باسشىسىنىڭ تاپسىرماسىنا سايكەس دەپۋتاتتار ازىرلەگەن.
زاڭ جوباسى اياسىندا قىلمىستىق كودەكسكە مەديسينا ماماندارىنا نەمەسە جەدەل جاردەم جۇرگىزۋشىلەرىنە قىزمەت مىندەتىن ورىنداۋ كەزىندە كۇش كورسەتكەنى، دەنساۋلىعى مەن قاۋىپسىزدىگىنە قول سۇققانى ءۇشىن قىلمىستىق جاۋاپكەرشىلىك جۇكتەيتىن جاڭا باپ ەنگىزىلەدى. ادام ءومىرى مەن دەنساۋلىعىنا ءقاۋىپتى ەمەس كۇش قولدانعانى ءۇشىن نەمەسە كۇش قولدانباق بولعانى ءۇشىن 500-دەن 1000 اەك-كە دەيىن ايىپپۇل سالۋ، نە بولماسا سول مولشەردە تۇزەتۋ جۇمىستارىنا نەمەسە 600 ساعاتقا دەيىن قوعامدىق جۇمىستارعا تارتۋ، 3 جىلعا دەيىن باس بوستاندىعىن شەكتەۋ نەمەسە ايىرۋ جازاسى ۇسىنىلادى.
ەگەر اۋىر ارەكەت جاسالسا، جازا 3 جىلدان 7 جىلعا دەيىن باس بوستاندىعىن شەكتەۋ نەمەسە باس بوستاندىعىنان ايىرۋ تۇرىندە كۇشەيتىلەدى. ادام ءومىرى مەن دەنساۋلىعىنا ءقاۋىپتى كۇش قولدانۋعا قاتىستى 5 جىلدان 10 جىلعا دەيىن باس بوستاندىعىنان ايىرۋ جازاسى قولدانىلادى. اۋىر جاعدايدا جاسالعان بولسا، 7 جىلدان 12 جىلعا دەيىن باس بوستاندىعىنان ايىرۋ جازاسى بەرىلەدى.
سونىمەن قاتار جوبا اياسىندا قىلمىستىق-پروسەستىك كودەكستە ىشكى ىستەر ورگاندارىنىڭ وسى ساناتتاعى ىستەر بويىنشا الدىن الا تەرگەۋ جانە انىقتاۋ جۇرگىزۋ قۇزىرەتى بەلگىلەنەدى.