ءماجىلىس مەملەكەت باسشىسىنىڭ ساۋلەت، قالا قۇرىلىسى جانە قۇرىلىس سالاسىنداعى زاڭنامانى جۇيەلەۋ جونىندەگى تاپسىرمالارىن ىسكە اسىرۋ اياسىندا ازىرلەنگەن جاڭا قۇرىلىس كودەكسىن جانە ونىڭ ىلەسپە تۇزەتۋلەرىن ەكىنشى وقىلىمدا قابىلدادى، - دەپ حابارلايدى Aqshamnews.kz.
قۇجات بويىنشا سەيسميكالىق ءقاۋىپتى اۋماقتارداعى قۇرىلىس تالاپتارى كۇشەيتىلىپ، قالا قۇرىلىسىن جوسپارلاۋ كەزىندە سەيسميكالىق ميكروايماقتاۋ كارتالارىن مىندەتتى ەسەپكە الۋ ءتارتىبى ەنگىزەدى. بۇل كارتالار سەيسميكالىق ءقاۋىپ دەڭگەيىن عانا ەمەس، سونىمەن قاتار گيدروگەولوگيالىق جاعدايدى، سونداي-اق بەلگىلى ءبىر ۋچاسكەلەردەگى توپىراق سيپاتىنىڭ ەرەكشەلىكتەرىن ەسكەرەدى.
كودەكستە سەيسميكالىق ءقاۋىپتى باعالاۋ جانە سەيسميكالىق ءقاۋىپتى باعالاۋ سىندى جاڭا رەتتەۋ ينستيتۋتتارى بەكىتىلگەن. سونداي-اق قۇرىلىس نىساندارىنىڭ توزىعى جەتكەندىگىن انىقتاۋعا، كونسترۋكسيالاردىڭ ساپاسىن تەكسەرۋگە، نىساندى توزعان دەپ تانۋعا، قايتا جاڭارتۋ مۇمكىندىگىنە باعىتتالعان قولدانىستاعى قۇرىلىس نىساندارىن پاسپورتتاۋ جونىندەگى نورمالار كوزدەلگەن. نىسانداردى پاسپورتتاۋ ءۇشىن جاۋاپكەرشىلىك جەرگىلىكتى اتقارۋشى ورگاندارعا جۇكتەلەدى.
سونىمەن قاتار قۇرىلىس كودەكسى قاجەتتى ينجەنەرلىك ىزدەنىم جۇمىسىن جۇرگىزبەي تۇرىپ جوبالىق قۇجاتتامانى دايىنداۋعا جانە نىسانداردى سالۋعا تىيىم سالادى. ەگەر قۇرىلىستىڭ تىعىزدىعى، عيماراتتاردىڭ بيىكتىگى نەمەسە الەۋمەتتىك ينفراقۇرىلىممەن قامتاماسىز ەتۋ نورمالارى بۇزىلسا، ەگجەي-تەگجەيلى جوسپارلاۋ جوباسىنا وزگەرىس ەنگىزۋگە بولمايدى. زاڭ قۇرىلىس نىسانىنىڭ «ەسكى» جانە «اپاتتىق» جاي-كۇيى، «ورت-تەحنيكالىق تەكسەرۋ» جانە «ساۋلەت، قالا قۇرىلىسى جانە قۇرىلىس قىزمەتى سالاسىنداعى اۆتوماتتاندىرىلعان ءتىزىلىم» ۇعىمدارىن ناقتىلايدى.