ەلىمىزدە جول قۇرىلىسىنا ەكولوگيالىق تۇرعىدان ءتيىمدى شەشىمدەردى ەنگىزۋ باعىتىندا جاڭا عىلىمي جوبا باستالدى.
ەسكىرگەن اسفالتتى قايتا قالپىنا كەلتىرىپ، ونى جول جابىندارىنىڭ جوعارعى قاباتتارىندا قايتا پايدالانۋعا مۇمكىندىك بەرەتىن يننوۆاسيالىق تەحنولوگيانى جاساۋعا كىرىستى، - دەپ حابارلايدى Aqshamnews.kz.
مامانداردىڭ ايتۋىنشا، بۇل زەرتتەۋ جۇمىسى قۇرامىندا اسفالتبەتوندى جاسارتاتىن جاڭا قوسپا دايىنداۋعا باعىتتالعان. مۇنداي تەحنولوگيا قۇرىلىس قالدىقتارىنىڭ كولەمىن ازايتىپ، ەنەرگيا شىعىنىن تومەندەتۋگە جانە كومىرقىشقىل گازىنىڭ شىعارىندىلارىن قىسقارتۋعا ىقپال ەتەدى.
ءبىزدىڭ ماقسات - جاڭا ماتەريال وندىرۋدەن گورى قولدا بار رەسۋرستاردى ءتيىمدى پايدالانۋ. بۇل قورشاعان ورتاعا تۇسەتىن سالماقتى ازايتىپ قانا قويماي، جول سالاسىن ەكولوگيالىق جانە تەحنولوگيالىق تۇرعىدا جاڭا دەڭگەيگە شىعارادى، - دەيدى قازجولعزي جول-قۇرىلىس ماتەريالدارى جانە جاڭا تەحنولوگيالار ءبولىمىنىڭ باسشىسى سالتانات ءاشىموۆا.
جوبا 2025-2027 جىلدارعا ارنالعان عىلىمي-تەحنيكالىق باعدارلامالار شەڭبەرىندە جۇزەگە اسىرىلىپ جاتىر. عالىمدار جاڭا جاسارتقىش قوسپانى قازاقستاننىڭ كليماتتىق ەرەكشەلىكتەرىنە بەيىمدەۋدى كوزدەيدى. ناتيجەسىندە، جول جامىلعىلارىنىڭ ساپاسى مەن ۇزاقمەرزىمدىلىگى ارتىپ، سالانىڭ اينالمالى ەكونوميكا قاعيداتتارىنا كوشۋى كۇشەيەدى دەپ كۇتىلۋدە.