قاسىم-جومارت توقايەۆ حالىقارالىق پادەل فەدەراسياسىنىڭ (FIP) پرەزيدەنتى لۋيدجي كاررارو مەن Premier Padel الەمدىك كاسىبي تۋرىنىڭ ءتوراعاسى ناسسەر بەن گانيم ال-حەلايفيدى قابىلدادى، - دەپ حابارلايدى Aqshamnews.kz.
بۇل تۋرالى اقوردانىڭ باسپا ءسوز قىزمەتى حابارلادى.
كەزدەسۋ بارىسىندا قازاقستاندا پادەل سپورتىن دامىتۋ پەرسپەكتيۆاسى تالقىلاندى. بۇگىندە ەلىمىزدە 1،5 مىڭنان استام ويىنشىنى بىرىكتىرەتىن قوعامداستىق قالىپتاسىپ، 16 وبلىستا وڭىرلىك فەدەراسيا قۇرىلدى.
پرەزيدەنت مەملەكەتتىڭ بۇقارالىق سپورتتى وركەندەتۋگە جانە زاماناۋي ينفراقۇرىلىم جاساقتاۋعا ايرىقشا كوڭىل ءبولىپ وتىرعانىن اتاپ ءوتتى.
قازىرگى كەزدە ەلىمىزدە پادەل ويىنىنا ارنالعان 17 كورت بار. 2027 جىلى الماتى قالاسىندا حالىقارالىق ستاندارتقا ساي كەلەتىن 10 كورتى بار ADD PADEL ARENA سپورت كەشەنىن اشۋ جوسپارلانىپ وتىر. ورتالىق ازياداعى زاماناۋي سپورت نىساندارىنىڭ بىرىنە اينالاتىن بۇل ارەنادا Premier Padel دەڭگەيىندەگى تۋرنيرلەردى ۇيىمداستىرۋعا بولادى.
پرەزيدەنت فۋتبولدى دامىتۋ ماسەلەسىنە دە ارنايى توقتالدى.
قاسىم-جومارت توقايەۆ ەلىمىزدە فۋتبول كلۋبتارىن جەكەشەلەندىرۋ جانە باسەكەلەس ورتا قالىپتاستىرۋ شارالارى جۇرگىزىلىپ جاتقانىنا نازار اۋداردى.
پرەزيدەنت ۋەفا اتقارۋشى كوميتەتىنىڭ مۇشەسى جانە «پاري سەن-جەرمەن» كلۋبىنىڭ اكسيونەرى رەتىندە فۋتبولدى ناسيحاتتاۋعا قوسقان ۇلەسى ءۇشىن ناسسەر ال-حەلايفيگە العىس ايتتى.
كەزدەسۋ سوڭىندا مەملەكەت باسشىسى قازاقستاننىڭ حالىقارالىق پادەل فەدەراسياسىمەن ىنتىماقتاستىعىن نىعايتۋ ەلىمىزدە وسى سپورت ءتۇرىن دامىتۋعا ءارى تانىمالدىلىعىن ارتتىرۋعا ىقپال ەتەتىنىنە سەنىم ءبىلدىردى.