مەملەكەت باسشىسى قازاقستان حالقىنا جولداۋىندا جەر رەسۋرستارىن ءتيىمدى پايدالانۋدىڭ ماڭىزدىلىعىن اتاپ ءوتتى، - دەپ حابارلايدى Aqshamnews.kz.
«ەلدىڭ دامۋى مەن ازاماتتاردىڭ ءال-اۋقاتى ءۇشىن قىزمەت ەتۋى ءتيىس ستراتەگيالىق رەسۋرس – بۇل، ءسوزسىز، جەر. مەن پايدالانىلماي جاتقان جانە زاڭسىز بەرىلگەن اۋىل شارۋاشىلىعى ماقساتىنداعى جەرلەردى قايتارىپ، ولاردى قايتا ءبولۋ جونىندە اۋقىمدى جۇمىستى باستادىم. جەر يەسىز قالماۋى كەرەك، ونى تەك ونىڭ ءقادىرىن بىلەتىندەرگە بەرۋ قاجەت»، – دەدى پرەزيدەنت.
وسى تاپسىرما اياسىندا 2025 جىلى اۋىل شارۋاشىلىعى مينيسترلىگى ماقساتىنا ساي پايدالانىلماعان نەمەسە زاڭ بۇزۋشىلىقتارمەن بەرىلگەن جەرلەردى قايتارۋ جونىندەگى جوسپاردى مەرزىمىنەن بۇرىن ورىندادى.
جۇمىس رەسپۋبليكالىق، وبلىستىق جانە اۋداندىق دەڭگەيلەردە جۇيەلى تۇردە جۇرگىزىلدى. باقىلاۋ ماقساتىندا جەردى قايتا ءبولۋ جونىندەگى رەسپۋبليكالىق كوميسسيا جانە وبلىستىق ۆەدومستۆوارالىق جۇمىس توپتارى قۇرىلدى.
جىل ىشىندە رەسپۋبليكالىق كوميسسيانىڭ 3 جانە وبلىستىق جۇمىس توپتارىنىڭ 42 وتىرىسى ءوتىپ، تەكسەرۋ ناتيجەلەرى مەن الداعى شارالار تالقىلاندى.
تەكسەرۋلەر 2،2 ملن گەكتار جەردى قامتىدى: 1،8 ملن گەكتار بويىنشا 1 286 ۇيعارىم بەرىلدى، 281،4 مىڭ گەكتار جەرگە قاتىستى سوت پروسەستەرى جالعاسۋدا، ال بۇرىن پايدالانىلماعان 464،7 مىڭ گەكتار جەردى جەر پايدالانۋشىلار ءوز بەتىمەن يگەرە باستادى.
قايتارىلعان جەرلەردىڭ 704،7 مىڭ گەكتارى حالىققا بەرىلدى: ونىڭ ىشىندە 176،6 مىڭ گەكتارى – قوعامدىق جايىلىمدار، 528،1 مىڭ گەكتارى – اۋىل شارۋاشىلىعى تاۋار وندىرۋشىلەرىنە كونكۋرس ارقىلى ءبولىندى.
«جەر اماناتى» كوميسسياسى مەن «AMANAT» پارتياسى پروسەسستىڭ اشىقتىعىن جانە قوعامنىڭ قاتىسۋىن قامتاماسىز ەتتى.
جوسپاردىڭ مەرزىمىنەن بۇرىن ورىندالۋى جەر رەسۋرستارىمەن جۇمىس ىستەۋدىڭ تيىمدىلىگىن، جەردى ۇتىمدى پايدالانۋ ءۇشىن جاعداي جاسالعانىن جانە قازاقستان اۋىل شارۋاشىلىعىنىڭ ودان ءارى دامۋىنا سەرپىن بەرىلگەنىن كورسەتەدى.