ەلدى مەكەندەردەگى جولداردىڭ ۇزىندىعى 61 مىڭ شاقىرىمدى قۇرايدى.
قازاقستان ۇكىمەتى ەلدى مەكەندەردەگى جول جوندەۋ جۇمىستارىنىڭ ساپاسىنا مىندەتتى ساراپتامانى ەنگىزۋ مەحانيزمىن دايارلاپ جاتىر، دەپ حابارلايدى Almaty-akshamy.kz.
جولداردىڭ ساپاسى بويىنشا اكىمدىكتەر رەيتينگىنىڭ ادىستەمەسى بيىلعى جىلدىڭ سوڭىنا دەيىن بەكىتىلمەك. بۇل تۋرالى ييدم باسپا ءسوز قىزمەتى حابارلاپ وتىر.
«اۆتوموبيل جولدارىنىڭ ساپاسىن ارتتىرۋعا بايلانىستى مەملەكەت باسشىسىنىڭ تاپسىرماسىنا وراي ق ر يندۋستريا جانە ينفراقۇرىلىمدىق دامۋ مينيسترلىگى ءبىرقاتار كەشەندى شارالاردى دايارلادى. سالاداعى باقىلاۋدى كۇشەيتۋ ماقساتىندا قولعا الىنعان جۇمىستار ىشىندە پروفيلدىك نورماتيۆتىك اكتىلەردىڭ ماڭىزىن جەتىلدىرۋگە دە جەتە نازار اۋدارىلىپ وتىر.اتاپ ايتقاندا، كولىك سالاسىنا قاتىستى جاڭا زاڭ جوباسى دايارلاندى. ول «جول اكتيۆتەرىنىڭ ۇلتتىق ساپا ورتالىعى» رمك ارقىلى ەلدى مەكەندەردەگى جول جوندەۋ جۇمىستارىنا مىندەتتى ساراپتاما جۇرگىزۋدى قاراستىرادى. ۇلتتىق ساپا ورتالىعى ساراپتاما بارىسىندا جوندەۋ جۇمىستارىنىڭ ءتيىستى نورمالارعا سايكەستىگىنە بايلانىستى قورىتىندى شىعارادى»،- دەلىنگەن ييدم باسپا ءسوز قىزمەتىنىڭ حابارلاماسىندا.
وسى ورايدا اتاپ وتكەن ءجون، بۇگىندە جولدى پايدالانۋعا بەرگەننەن كەيىن تەحنيكالىق قاداعالاۋ مەن جوبانى جۇزەگە اسىرعان مەكەمەلەر جوندەۋ جۇمىستارى بارىسىنداعى قاتە شەشىمدەر مەن اقاۋلار ءۇشىن جاۋاپكەرشىلىككە تارتىلمايدى.
وسى ولقىلىقتىڭ الدىن الۋ ماقساتىنداعى زاڭ جوباسى قازىرگى كۇندە پارلامەنت ءماجىلىسىنىڭ قاراۋىندا.
سونداي-اق مينيسترلىك اۆتوموبيل جولدارى سالاسىنداعى 1200-گە جۋىق نورماتيۆتىك-قۇقىقتىق اكتىلەردىڭ ماڭىزىن ارتتىرۋدى قولعا الۋدا. ولار مەكەمەنىڭ اتقاراتىن جۇمىسىن رەتتەپ، باقىلاۋ ساپاسىن كۇشەيتەدى. اتالعان قۇجاتتارعا جول جوندەۋ جۇمىستارىنا حالىقارالىق تاجىريبە مەن تەحنولوگيالاردى جانە زاماناۋي ماتەريالداردى قولدانۋ سىندى ءبىرقاتار وزگەرىستەر ەنگىزۋ قاراستىرىلۋدا.
قوسىمشا ىنتالاندىرۋ شاراسى رەتىندە ق ر ييدم جولداردىڭ ساپاسىنا بايلانىستى اكىمدەردىڭ رەيتينگىن انىقتاۋ ادىستەمەسىن دايارلاۋدا. ول 2022 جىلدىڭ اياعىنا دەيىن بەكىتىلمەك.
ايتا كەتەيىك، قازاقستانداعى ورتاق پايدالانىلاتىن اۆتوموبيل جولدارىنىڭ جالپى ۇزىندىعى 157 مىڭ شاقىرىمدى قۇرايدى. ونىڭ ىشىندە 25 مىڭ شاقىرىم رەسپۋبليكالىق ماڭىزى بار جول جەلىسى بولسا، 71 مىڭ شاقىرىم جەرگىلىكتى ماڭىزى بار جولدار ساناتىنا كىرەدى. ال ەلدى مەكەندەردەگى جولداردىڭ ۇزىندىعى 61 مىڭ شاقىرىم.
قازىرگى قولدانىستاعى زاڭعا وراي رەسپۋبليكالىق ماڭىزى بار جولدارعا يندۋستريا جانە ينفراقۇرىلىمدىق دامۋ مينيسترلىگى مەن «قازاقاۆتوجول» ۇك» اق تىكەلەي جاۋاپتى. ال جەرگىلىكتى ماڭىزى بار جولدار مەن ەلدى مەكەن اراسىنداعى جولدار جەرگىلىكتى اتقارۋشى ورگانداردىڭ قۇزىرەتىندە.