قازاقستاندا 2021 جىلى ىشكى تۋريستەر سانى 6،9 ملن بولدى.
بۇل - الدىڭعى جىلدارمەن سالىستىرعاندا، رەكوردتىق كورسەتكىش. ەكوتۋريزمدى دامىتۋ جونىندەگى كەڭەستە مادەنيەت جانە سپورت ۆيسە-مينيسترى ەرجان ەركىنبايەۆ وسىلاي مالىمدەدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
سونداي-اق جىل سوڭىنا دەيىن رەسپۋبليكاعا 700 مىڭعا جۋىق شەتەلدىك تۋريست كەلەدى دەپ كۇتىلۋدە.
«28 ەلمەن 107 باعىت بويىنشا حالىقارالىق قاتىناستار قالپىنا كەلتىرىلدى، سونداي-اق 77 ەلدىڭ ازاماتتارى ءۇشىن ۆيزاسىز رەجيم قالپىنا كەلتىرىلدى. 2021 جىلدىڭ قورىتىندىسى بويىنشا ۇلتتىق پاركتەرگە بارۋشىلار سانى 1،5 ملن ادام بولدى. 2022 جىلدىڭ سوڭىنا دەيىن ۇلتتىق پاركتەرگە كەلۋشىلەردىڭ سانىن 1،6 ملن-عا دەيىن ارتتىرۋ جوسپارلانىپ وتىر»،- دەپ اتاپ ايتتى ۆيسە-مينيستر.
ايتا كەتۋ كەرەك، سالالىق مەكەمە جىل سوڭىنا دەيىن ىشكى تۋريزمگە ينۆەستيسيالاردى 708 ملرد تەڭگەگە دەيىن ۇلعايتۋدى جوسپارلاپ وتىر. 31 مىڭنان استام ادام تۋريزم سالاسىنا جۇمىسقا تارتىلعان. شەتەلدىك تۋريستەر ءۇشىن تۋروپەراتورلاردى سۋبسيديالاۋ، بالالار اۋە بيلەتىنىڭ قۇنىن وتەۋ، تاۋ شاڭعىسى جابدىقتارى مەن تۋراۆتوبۋستاردى ساتىپ الۋ، تۋريستىك جانە جول بويىنداعى قىزمەت كورسەتۋ نىساندارىنا كەتكەن شىعىندى وتەپ بەرۋ بويىنشا مەملەكەتتىك قولداۋ شارالارى جۇزەگە اسىرىلۋدا. ىشكى ءتۋريزمدى ىلگەرىلەتۋ ءۇشىن NeoNomad اكسيالارى ۇيىمداستىرىلىپ جاتىر، ول ىشكى تۋريستەردى ەلىمىزدىڭ 20 ءوڭىرىن ارالاۋعا ىنتالاندىرادى.
تۇرگەن شاتقالىندا تۋريستەرگە ارنالعان ۆيزيت-ورتالىق اشىلدى
سونداي-اق تۋريستەرگە ارنالعان جاڭا ۆيزيت-ورتالىقتارىنىڭ سانى ارتىپ كەلەدى. زاماناۋي ۇلگىدەگى ورتالىقتا جەرگىلىكتى ساياحاتشىلار مەن شەتەلدىك مەيماندار ۇلتتىق پاركتىڭ قىزمەتى تۋرالى بارلىق قاجەتتى اقپاراتتى الا الادى. سونداي-اق «Turgensai» كەشەنىندە ءدارىس زالى، كادەسىي دۇكەنى، تاماقتانۋ ورنى مەن ويىن الاڭى جۇمىس ىستەيدى. وسىلايشا ساياحاتشىلاردىڭ الاڭسىز تىنىعۋىنا بارلىق جاعداي جاسالعان. مۇنداي ورتالىقتار الداعى كۇندەرى التىنەمەل مەن شارىن ۇلتتىق پاركتەرىندە اشىلادى دەپ جوسپارلانىپ وتىر.