قازاقستاندا 2025 جىلدىڭ باسىنان بەرى ەسىرتكى تاسىمالىنىڭ 111 جەتكىزۋ ارناسى جويىلىپ، 21 ناركوزەرتحانا اشكەرەلەندى، دەپ حابارلايدى اqshamnews.kz باس پروكۋراتۋراعا سىلتەمە جاساپ.
2025 جىلدىڭ باسىنان بەرى ەلىمىزدە ەسىرتكىنىڭ زاڭسىز اينالىمىنا قارسى كۇرەس كۇشەيە ءتۇستى. باسپروكۋراتۋرانىڭ حابارلاۋىنشا، وسى ۋاقىت ارالىعىندا قۇقىق قورعاۋ جانە ارنايى ورگانداردىڭ ۇيلەسىمدى جۇمىسىنىڭ ناتيجەسىندە 111 ەسىرتكى تاسىمالى ارناسى جويىلىپ، 21 ناركوزەرتحانانىڭ قىزمەتى توقتاتىلعان. سونىمەن قاتار، قۇرامىندا ەسىرتكىسى بار وسىمدىكتەردى زاڭسىز ءوسىرۋدىڭ 125 فاكتىسى انىقتالدى.
باسپروكۋراتۋرانىڭ دەرەگىنشە، بۇل باعىتتا ارنايى پروكۋرورلار ايتارلىقتاي جۇمىس اتقارعان. ولار ماڭعىستاۋ، ۇلىتاۋ وبلىستارى مەن الماتى، شىمكەنت قالالارىندا ينتەرنەت ارقىلى ەسىرتكى تاراتقان ناركودۇكەندەردىڭ ۇيىمداستىرۋشىلارىن اشكەرەلەپ، ىستەردى ساپالى تەرگەگەن.
9 توننا ەسىرتكى مەن 12 توننا پرەكۋرسور تاركىلەندى
جىل باسىنان بەرى تاركىلەنگەن ەسىرتكى كولەمى – 9 توننا، ونىڭ ىشىندە 254 كيلوگرامى سينتەتيكالىق زاتتار. سونداي-اق، 12 توننا پرەكۋرسور (ەسىرتكى جاساۋعا قولدانىلاتىن حيميالىق زاتتار) تاركىلەندى. ەسىرتكى كونترابانداسى دەرەكتەرى بىلتىرعى كەزەڭمەن سالىستىرعاندا 56 پايىزعا ازايىپ، 182 جاعدايدان 80-گە دەيىن تۇسكەن.
ينتەرنەت-دۇكەندەرگە قارسى جاڭا تاسىلدەر: ەسەپشوتتار بۇعاتتالىپ جاتىر
ەسىرتكى ساتۋمەن كۇرەستە قارجىلىق تىزبەكتەردى انىقتاۋعا دا باسىمدىق بەرىلىپ جاتىر. باس پروكۋراتۋرانىڭ باستاماسىمەن ينتەرنەت-دۇكەندەرمەن بايلانىستى بانك شوتتارىن انىقتاۋ، بۇعاتتاۋ جانە ارەستكە قويۋ الگوريتمى ەنگىزىلگەن. ناتيجەسىندە 98 مىڭنان استام بانك شوتى بۇعاتتالىپ، ولاردىڭ ىشىندەگى قاراجات كولەمى 2،3 ميلليارد تەڭگەدەن اسقان.
قىلمىستىق ىستەر شەڭبەرىندە قارجىلىق تەرگەۋلەر جالعاسىپ جاتىر. ماقسات – ەسىرتكى ساتۋدان تۇسكەن تابىستىڭ قايدان شىققانىن، تۇپكى يەلەرىن جانە ءوز شوتتارىن "دروپپەرلىك" وپەراسيالارعا پايدالانۋعا بەرگەن ازاماتتاردى انىقتاۋ.
سونىمەن قاتار، "كيبەرنادزور" جۇيەسى ارقىلى ينتەرنەتتەگى زاڭسىز ەسىرتكى ساتاتىن 6 مىڭنان استام سايتتىڭ قىزمەتى توقتاتىلعان.