2026 جىلعى 1 قاڭتاردان باستاپ قازاقستاندا ءبىرقاتار مەملەكەتتىك جاردەماقىنىڭ مولشەرى ارتتى، - دەپ حابارلايدى aqshamnews.kz ءتىلشىسى.
اەك ءوستى
1 قاڭتاردان باستاپ ايلىق ەسەپتىك كورسەتكىش (اەك) 3 932 تەڭگەدەن 4 325 تەڭگەگە ءوستى. بۇل - جاردەماقى، ايىپپۇل جانە وزگە دە الەۋمەتتىك تولەمدەردى ەسەپتەۋگە قولدانىلاتىن بازالىق كورسەتكىش.
سوندىقتان اەك-كە بايلانعان تولەمدەر اۆتومات تۇردە ارتادى. بۇدان بولەك، ۇكىمەت كەيبىر جاردەماقىلاردى قوسىمشا 10% ارتتىردى.
بالا تۋۋىنا بەرىلەتىن جاردەماقى
ءبىر، ەكى نەمەسە ءۇش بالا تۋعان كەزدە بەرىلەتىن جاردەماقى 149 416 تەڭگەدەن 164 350 تەڭگەگە دەيىن، ال ءتورت جانە ودان دا كوپ بالا تۋعان جاعدايدا جاردەماقى مولشەرى 247 716 تەڭگەدەن 272 475 تەڭگەگە دەيىن وسەدى.
كوپبالالى وتباسىلارعا تولەم
كوپبالالى وتباسىلارعا تولەنەتىن جاردەماقى دا ارتادى: ءتورت بالاسى بار وتباسىلار ءۇشىن 63 030 تەڭگەدەن 69 330 تەڭگەگە، ال 10 بالاسى بار وتباسىلار ءۇشىن 157 280 تەڭگەدەن 173 000 تەڭگەگە دەيىن ۇلعايادى.
مۇگەدەكتىگى بار ادامدارعا جاردەماقى
مۇگەدەكتىگى بار ازاماتتارعا بەرىلەتىن جاردەماقى مولشەرى دە 10 پايىزعا وسەدى:
- ءبىرىنشى توپتاعى مۇگەدەكتىگى بار ادامدارعا تولەنەتىن جاردەماقى 101 702 تەڭگەدەن 111 872 تەڭگەگە؛
- ەكىنشى توپتاعىلارعا 81 362 تەڭگەدەن 89 498 تەڭگەگە؛
- ءۇشىنشى توپتاعىلارعا 55 474 تەڭگەدەن 61 021 تەڭگەگە دەيىن كوبەيەدى.
بۇدان بولەك
- اسىراۋشىسىنان ايىرىلۋ بويىنشا؛
- ەڭبەككە قابىلەتتىلىگىن جوعالتۋ بويىنشا.
بۇل تولەمدەر مەملەكەتتىك الەۋمەتتىك ساقتاندىرۋ قورىنان جۇرگىزىلەدى جانە ءار ادامعا جەكە ەسەپتەلەدى. مولشەرىنە مىنالار اسەر ەتەدى:
- كەيىنگى 2 جىلداعى الەۋمەتتىك اۋدارىمدار تولەنگەن ورتاشا ايلىق تابىس؛
- ەڭبەككە قابىلەتتىلىكتەن ايىرىلۋ دارەجەسى؛
- اسىراۋىنداعى ادامدار سانى؛
- مىندەتتى الەۋمەتتىك ساقتاندىرۋ جۇيەسىنە قاتىسۋ ءوتىلى؛
- تابىستى الماستىرۋ كوەففيسيەنتى.