قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا قازاقستان 2026 جىلعى شىلدەگە دەيىن نەسيە مولشەرلەمەلەرىن ەسەپتەۋدىڭ جاڭا ادىستەمەسى ازىرلەنەتىنىن مالىمدەدى، - دەپ حابارلايدى aqshamnews.kz ءتىلشىسى.
ءماجىلىس وتىرىسىندا دەپۋتات تىلەكتەس ادامبەكوۆ قنردا ءتوراعاسى ءمادينا ءابىلقاسىموۆادان قازاقستاندا تۇتىنۋشىلىق جانە يپوتەكالىق كرەديتتەر بويىنشا مولشەرلەمەلەر قاشان تومەندەيتىنىن سۇرادى.
جاۋاپ رەتىندە ءابىلقاسىموۆا اگەنتتىك ءبىرقاتار قادام جاساعانىن ەسكە سالدى:
"وزدەرىڭىز بىلەسىزدەر، بىلتىر زاڭ قابىلداعاننان كەيىن تۇتىنۋشىلىق كرەديتتەر بويىنشا بارلىق مولشەرلەمەنى 56 پايىزدان 46 پايىزعا دەيىن، يپوتەكا بويىنشا 30 پايىزدان 25 پايىزعا دەيىن تومەندەتتىك. كەپىلسىز كرەديتتەر بويىنشا مولشەرلەمەنى 45 پايىزعا دەيىن تومەندەتتىك"، - دەدى ول.
ونىڭ ايتۋىنشا، 2025 جىلى يپوتەكالىق قارىزدار بويىنشا مولشەرلەمەنى 20 پايىزعا دەيىن تومەندەتۋگە مۇمكىندىك تۋعان. الايدا ۇلتتىق بانك بازالىق مولشەرلەمەنى 18 پايىزعا كوتەرگەننەن كەيىن، كوپتەگەن بانك يپوتەكا بەرۋدى ۋاقىتشا توقتاتتى.
ءابىلقاسىموۆا نورمانىڭ ارەكەت ەتۋ مەرزىمى 2026 جىلعى 1 شىلدەگە دەيىن ۇزارتىلعانىن ايتتى. وسى ۋاقىتقا دەيىن قنردا ۇلتتىق بانكپەن بىرلەسىپ، بازالىق مولشەرلەمەگە بايلانعان جاڭا ەسەپتەۋ ادىستەمەسىن ازىرلەيدى.
سونداي-اق، قنردا تۇتىنۋشىلىق كرەديتتەر بويىنشا تاسىلدەردى قايتا قاراۋدى جوسپارلاپ وتىر:
"نارىقتاعى ورتاشا مولشەرلەمە ءقازىر 35–36 پايىز بولادى. ءبىز جاڭا ادىستەمە وسى دەڭگەيدە ازىرلەنەدى جانە باسەكەلەستىك ەسەبىنەن مولشەرلەمەلەر تومەندەۋى ءتيىس دەپ ەسەپتەيمىز"، - دەدى ءابىلقاسىموۆا.