“QazaqGaz” ۇلتتىق كومپانياسىنىڭ باسشىسى الىبەك جاماۋوۆ “سامۇرىق-قازىنا” قورىنىڭ قوعامدىق كەڭەسى وتىرىسىندا قازاقستاندا گازدىڭ كوتەرمە باعاسىن ارتتىرۋ قاجەت ەكەنىن مالىمدەدى، دەپ حابارلايدى aqshamnews.kz
الىبەك جاماۋوۆتىڭ ايتۋىنشا، تاۋارلىق گازدىڭ كوتەرمە باعاسى كەزەڭ-كەزەڭىمەن ءوسىپ جاتقانىنا قاراماستان، قازاقستان ءالى دە حالىق ءۇشىن كوگىلدىر وتىننىڭ ءتاريفى ەڭ تومەن ەلدەردىڭ ءبىرى بولىپ وتىر.
“33% كولەمىندەگى سوڭعى تۇزەتۋدى ەسكەرگەننىڭ وزىندە، ىشكى نارىقتاعى “QazaqGaz” كومپانياسىنىڭ جىل سايىنعى سۋبسيديا كولەمى 200 ميلليارد تەڭگە دەڭگەيىندە قالىپ وتىر. سونىمەن قاتار سوڭعى جىلدارى گاز باعاسىنىڭ ءوسۋى الەۋمەتتىك ماڭىزى بار تاۋارلاردىڭ كوپشىلىگىنە قاراعاندا الدەقايدا تومەن بولدى. بۇدان بولەك، سوڭعى ون جىلدىقتا قازاقستاندىقتاردىڭ كوممۋنالدىق شىعىندارىنداعى گازدىڭ ۇلەسى 6،4%-دان 5،2%-عا دەيىن ازايدى”، دەدى ول.
ونىڭ سوزىنشە، گازدىڭ تۇراقتى جەتكىزىلۋىن قامتاماسىز ەتۋ، ينۆەستيسيالىق جوبالاردى ىسكە اسىرۋ جانە ينفراقۇرىلىمدى دامىتۋ ءۇشىن كوتەرمە باعانى بىرتىندەپ وزىندىك قۇن دەڭگەيىنە دەيىن جەتكىزۋ قاجەت. الىبەك جاماۋوۆ بۇل ەلدىڭ ەنەرگيا قاۋىپسىزدىگىن نىعايتىپ، قازاقستاننىڭ بارلىق وڭىرلەرىن سەنىمدى تۇردە گازبەن قامتاماسىز ەتۋگە مۇمكىندىك بەرەدى دەپ سانايدى.