قازاقستاندا ەگىن جيناۋ جۇمىستارى ۋاقىتىلى باستالدى

جاپپاي ەگىن جيناۋ رەسپۋبليكانىڭ بارلىق وڭىرلەرىندە باستالدى.

ورتالىق كوممۋنيكاسيالار قىزمەتى الاڭىندا ق ر اۋىل شارۋاشىلىعى ۆيسە-مينيسترى ءابىلحايىر تامابەك 2022 جىلعى ەگىن جيناۋ ناۋقانىنىڭ بارىسى تۋرالى بايانداما جاسادى، دەپ حابارلايدى Almaty-akshamy.kz Inbusiness.kz cىلتەمە جاساپ.

ونىڭ ايتۋىنشا، بيىلعى قولايلى جاعدايلار ەگىن جيناۋ جۇمىستارىن ۋاقىتىلى باستاۋعا مۇمكىندىك بەردى. بۇگىنگى كۇنى ەل بويىنشا جالپى 9،2 ملن گەكتار ءداندى جانە ءداندى-بۇرشاقتى داقىلدار جينالدى. ول جوسپاردىڭ 57،8% قۇرايدى. ورتاشا ونىمدىلىك 12 س/گا قۇراپ، 11،2 ملن توننا استىق باستىرىلدى. جاپپاي ەگىن جيناۋ رەسپۋبليكانىڭ بارلىق وڭىرلەرىندە باستالدى.

«بيىل اۋىل شارۋاشىلىعى داقىلدارىنىڭ جيناۋدىڭ جالپى الاڭى 23،4 ملن گەكتاردى قۇرادى، ونىڭ ىشىندە 16،1 ملن-ى ءداندى داقىلدار. ايتا كەتەيىك، ەگىس ناۋقانى ساپالى تۇقىمداردى قولدانا وتىرىپ، وڭتايلى مەرزىمدە جۇرگىزىلدى. شارۋالار ۋاقىتىندا تىڭايتقىشتار سالىپ، حيميالىق وڭدەۋدى ۋاقىتىلى جۇرگىزدى. بۇل ءوز  كەزەگىندە داقىلداردىڭ ساپاسىنا وڭ اسەر ەتتى. ەگىن جيناۋ جۇمىستارىن جۇرگىزۋ ءۇشىن 147،7 مىڭ تراكتور، 38،1 مىڭ استىق جينايتىن كومباين، 73،4 مىڭ تراكتور تىركەمەسى بار»، – دەدى ۆيسە-مينيستر.

سونداي-اق جاپپاي ەگىن جيناۋ جۇمىستارىن باستاۋ ءۇشىن «جاسىل دامۋ»  اق قاراجاتى ەسەبىنەن اۋىل شارۋاشىلىق تەحنيكاسىن جەڭىلدىكپەن نەسيەلەندىرۋ تەتىگى پىسىقتالدى. جەڭىلدەتىلگەن ليزينگكە شامامەن 40 ملرد تەڭگە باعىتتالدى. 2022 جىلعى 5 تامىزدان باستاپ «قازاگروقارجى» اق بارلىق فيليالدارىندا وسى باعدارلامالارعا قاتىسۋعا وتىنىمدەر قابىلداۋ جۇزەگە اسىرىلۋدا. بۇگىنگى كۇنى 44،7 ملرد تەڭگە سوماسىنا 874 ءوتىنىم قابىلدادى. بۇل رەتتە قارجىلىق ليزينگ شارتى 345 ءوتىنىم بويىنشا 18،4 ملرد تەڭگە سوماسىنا جاسالدى. 11،9 ملرد تەڭگەگە 160 ءوتىنىم ماقۇلداندى.