«قازاقفيلمگە» جاڭا مىندەتتەر جۇكتەلەدى

«قازاقفيلمگە» دەكوراسيالاردى، پاۆيلونداردى، ساحنالىق زاتتاردى ساقتاۋ جۇكتەلەدى.

بۇل تۋرالى ءماجىلىستىڭ جالپى وتىرىسىندا كينەماتوگرافيا جانە مادەنيەت ماسەلەلەرى بويىنشا زاڭ جوباسىن تالقىلاۋ كەزىندە مادەنيەت جانە سپورت ءمينيسترى داۋرەن ابايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«اتاپ ايتقاندا، «ءقازاقفيلمدى» سالاداعى مەملەكەتتىك قورىن ساقتاۋدى جۇزەگە اسىراتىن زاڭدى تۇلعا رەتىندە انىقتاۋ ۇسىنىلعان. ءوز كەزەگىندە «قازاقفيلم» بۇل قىزمەتتى ونداعان جىلدار بويى تابىستى اتقارىپ كەلدى. سونىمەن قاتار جاڭعىرتۋ اياسىندا ولار فيلمدەردى سيفرلى نۇسقاعا اۋىستىرۋ قۇرىلعىسىن ساتىپ الدى جانە وتاندىق كينونىڭ التىن قورىن بىرتىندەپ سيفرلى فورماتقا اۋىستىرۋ مۇمكىندىگى پايدا بولدى»، - دەدى د. ابايەۆ.

سونداي-اق ول ۇلتتىق فيلمدەر تۇسىرۋدە ساتىپ الىنعان ساحنا-قويىلىم قۇرالدارىن ساقتاۋ جانە پايدالانۋ ماسەلەسىن رەتتەۋ ۇسىنىلىپ وتىرعانىن ايتتى.

«بۇل جەردە دەكوراسيالار، پاۆيلوندار، ساحنالىق زاتتار تۋرالى ءسوز بولىپ وتىر. بۇگىندە ءتۇسىرىلىم اياقتالعاننان كەيىن بارلىق جابدىق ستۋديالارعا بەرىلەدى نەمەسە يەسىز قالادى. وسى ورايدا، تۇسىرىلىمنەن كەيىن قالعان ساحنالىق-قويىلىمدىق قۇرالداردى ساقتاۋدى «قازاقفيلمگە» تاپسىرۋ ۇسىنىلادى»، - دەدى مينيستر.