كونستيتۋسيا مەن كونستيتۋسيالىق زاڭدارعا سايكەس، دەپۋتاتتىڭ مانداتى ءبىرقاتار قۇقىقتىق جانە ساياسي سەبەپتەر بويىنشا توقتاتىلۋى مۇمكىن.
Aqshamnews.kz رەداكسياسى جولداعان رەسمي ساۋالعا جاۋاپ رەتىندە ق ر پرەزيدەنتى ءىس باسقارماسى پارلامەنت دەپۋتاتتارىنىڭ وكىلەتتىگىن توقتاتۋعا نەگىز بولاتىن زاڭدى تالاپتاردى ءتۇسىندىردى.
ق ر كونستيتۋسياسىنىڭ 52-بابىنىڭ 5-تارماعىنا سايكەس، پارلامەنت دەپۋتاتىنىڭ وكىلەتتىگى كەلەسى جاعدايلاردا توقتاتىلادى:
- دەپۋتات ءوز ەركىمەن وتستاۆكاعا كەتكەن؛
- قايتىس بولعان؛
- سوتتىڭ زاڭدى كۇشىنە ەنگەن شەشىمى بويىنشا ارەكەتكە قابىلەتسىز، حابار-وشارسىز كەتكەن نەمەسە قايتىس بولدى دەپ تانىلعان؛
- كونستيتۋسيا مەن كونستيتۋسيالىق زاڭدا كوزدەلگەن وزگە دە نەگىزدەر ورىن العان جاعدايدا.
سونىمەن قاتار، دەپۋتات مانداتىنان ايىرىلاتىن قوسىمشا نەگىزدەر مىنالار:
- قازاقستاننان تىس جەرگە تۇراقتى تۇرۋعا كەتسە؛
- وعان قاتىستى سوتتىڭ ايىپتاۋ ۇكىمى زاڭدى كۇشىنە ەنسە؛
- قازاقستان ازاماتتىعىنان ايىرىلسا.
ءماجىلىس دەپۋتاتتارى ءۇشىن قوسىمشا جاعدايلار:
- ءوزى سايلانعان ساياسي پارتيادان شىققان نەمەسە شىعارىلعان بولسا؛
- پارتيالىق تىزىممەن سايلانعان ساياسي پارتيا قىزمەتى توقتاتىلعان بولسا؛
- ءبىر مانداتتىق وكرۋگتەن سايلانعان دەپۋتاتتى سايلاۋشىلار زاڭمەن بەلگىلەنگەن تارتىپپەن كەرى شاقىرسا.
سونىمەن قاتار، كونستيتۋسيانىڭ 52-بابىنىڭ 3-تارماعىنا سايكەس، پارلامەنت دەپۋتاتىنا كەلەسى ىستەرمەن اينالىسۋعا تىيىم سالىنادى:
- باسقا وكىلدى ورگاننىڭ دەپۋتاتى بولۋعا؛
- وقىتۋشىلىق، عىلىمي جانە شىعارماشىلىقتان وزگە، اقىلى قىزمەتپەن اينالىسۋعا؛
- كاسىپكەرلىكپەن شۇعىلدانۋعا؛
- كوممەرسيالىق ۇيىمنىڭ باسقارۋ ورگاندارىنا نەمەسە بايقاۋشى كەڭەسىنە كىرۋگە.
اتالعان ەرەجەلەر بۇزىلعان جاعدايدا، دەپۋتات وكىلەتتىگىنەن ايىرىلۋى مۇمكىن.
بۇعان دەيىن دەپۋتات قانداي جاعدايدا سوزدەن دە، جالاقىدان دا قاعىلاتىنىن جازعان ەدىك.