بيىل العاش رەت تۇركىتىلدەس ەلدەر اراسىندا بولاشاق جۇمىسشى مامانداردىڭ كاسىبي شەبەرلىگىن ارتتىرۋعا باعىتتالعان TurkicSkills كاسىبي شەبەرلىك چەمپيوناتى وتەدى.
بۇل تۋرالى قازاقستاننىڭ وقۋ-اعارتۋ مينيسترلىگىنىڭ باسپا ءسوز قىزمەتى مالىمدەدى، دەپ حابارلايدى aqshamnews.kz.
بۇل شارا مەملەكەت باسشىسى جاريالاعان جۇمىسشى ماماندىقتارى جىلى اياسىندا وتەتىن نەگىزگى ءىس-شارالاردىڭ بىرىنە اينالماق. باستاما تۇركىتىلدەس ەلدەردىڭ جاستارى مەن ستۋدەنتتەرى اراسىندا كاسىبي شەبەرلىكتى دامىتۋ مەن ىلگەرىلەتۋگە، ءتۇرلى سالالارداعى ۇزدىك تاجىريبەلەردى انىقتاۋعا، ەكونوميكاسى ءوزارا بايلانىسقان ەلدەرمەن يننوۆاسيالىق شەشىمدەر بويىنشا تاجىريبە الماسۋعا جانە ولاردى ىسكە اسىرۋ ءۇشىن پلاتفورما قۇرۋعا باعىتتالعان.
چەمپيونات تۇركسوي ۇيىمىنىڭ 2025 جىلعى مادەني استاناسى بولىپ تاڭدالعان اقتاۋ قالاسىندا وتەدى دەپ كۇتىلۋدە.
انىقتاما ءۇشىن: WorldSkills قوزعالىسى كاسىبي قۇزىرەتتىلىكتەر مەن داعدىلاردى جەتىلدىرۋ ءۇشىن بىرلەسىپ جۇمىس ىستەيتىن 89 ەلدى بىرىكتىرەتىن الەمدەگى جۇمىسشى كاسىپتەرىنىڭ بەدەلىن ارتتىرۋدىڭ نەگىزگى قۇرالدارىنىڭ ءبىرى بولىپ تابىلادى. قازاقستان 2014 جىلدان باستاپ WorldSkills International حالىقارالىق قوزعالىسىنىڭ تولىققاندى مۇشەسى بولىپ تابىلادى. 10 جىل ىشىندە ەلىمىزدە 30 قۇزىرەتتىلىك بويىنشا 200-گە جۋىق وڭىرلىك جانە 8 رەسپۋبليكالىق چەمپيونات وتكىزىلدى. وتكەن جىلى ۇلتتىق قۇراما WorldSkills Lyon 2024 الەم چەمپيوناتىندا ەل تاريحىندا ۇزدىك ناتيجەلەرگە قول جەتكىزىپ، «ۇلتتىڭ ۇزدىگى» نوميناسياسى بويىنشا 6 مەدال مەن ماراپاتقا يە بولدى.