كۇدىكتىلەردىڭ كەلتىرگەن شىعىنى - 200 ملن تەڭگەدەن اسادى.
قىزىلوردا وبلىسى پوليسيا دەپارتامەنتى ۇيىمداسقان قىلمىسقا قارسى كۇرەس باسقارماسى پروكۋراتۋرانىڭ ۇيلەستىرۋىمەن قالاداعى كاسىپورىننان مۇناي ونىمدەرىن ۇرلاۋمەن اينالىسقان ادامدار توبىن ۇستادى، دەپ حابارلايدى aqshamnews.kz Polisia.kz-كە سىلتەمە جاساپ.
– قىلمىستىق سحەماعا ءوندىرىس نىسانىنىڭ قىزمەتكەرلەرى مەن كۇزەتشىلەرى تارتىلعان. 20-دان استام ءتىنتۋ شارالارى جۇرگىزىلدى. 25 توننادان استام ۇرلانعان مۇناي ونىمدەرى تاركىلەندى. كۇدىكتىلەردىڭ ارەكەتىنەن كاسىپورىنعا كەلتىرىلگەن الدىن الا شىعىن 200 ميلليون تەڭگەدەن اسادى. پوليسياعا 12 ادام جەتكىزىلدى، ونىڭ 9-ى ۋاقىتشا ۇستاۋ يزولياتورىنا قامالدى. وبلىستىق پوليسيا دەپارتامەنتىنىڭ تەرگەۋ باسقارماسى مۇناي ونىمدەرىن ۇرلاۋ جانە ءتيىستى قۇجاتتارسىز تاسىمالداۋ فاكتىلەرى بويىنشا تەرگەۋ جۇرگىزۋدە، – دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.