وتباسىن بۇزىپ، اجىراساتىنداردىڭ ەڭ كوپ ۇلەسى الماتى قالاسىنا تيەسىلى.
بۇل تۋرالى ق ر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى ازاماتتىق جانە اكىمشىلىك سالالارداعى قۇقىقتىق اقپاراتتى قالىپتاستىرۋ باسقارماسىنىڭ باسشىسى داميليا حاميتوۆا ايتتى، دەپ حابارلايدى Almaty-akshamy.kz.
باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ دەرەگىنشە، بيىلعى 6 ايدا سوت نەكە جانە وتباسى داۋلارىنا قاتىستى 23 755 ازاماتتىق ءىس قارالىپ، 22 341ء-ى قاناعاتتاندىرىلعان. ونىڭ ىشىندە نەكەنى بۇزۋ تۋرالى 18 282، اليمەنت ءوندىرۋ بويىنشا 1 510 ازاماتتىق ءىس قارالعان.
ەڭ كوپ نەكەنى بۇزۋ تۋرالى ازاماتتىق ىستەر الماتى قالاسىندا (2564)، الماتى وبلىسىندا (2048)، نۇر-سۇلتان قالاسىندا (1604)، قاراعاندى وبلىسىندا (1538) تىركەلگەن. 2021 جىلدىڭ جارتى جىلىمەن سالىستىرعاندا الماتى قالاسىندا 8%-عا، نۇر-سۇلتان قالاسىندا 2%-عا نەكە بۇزۋ دەرەكتەرى ارتسا، قالعان وڭىرلەردە اجىراسۋ سانى ازايعان.
«وتباسىنىڭ اجىراسۋى كامەلەتكە تولماعان بالالارعا اۋىر سوققى بولارى انىق. اكەلەردىڭ ءوز ۇرپاعىنا قايىرىمسىز بولۋى انا مەن بالانىڭ تۇرمىستىق جاعدايىن ناشارلاتادى. ءقازىر رەسپۋبليكا بويىنشا 3 949 027 بورىشكەر سوت ورىنداۋشىنىڭ ەسەبىندە تۇر. ونىڭ 133 مىڭنان استامى عانا اليمەنتتى ءوز ەركىمەن تولەيدى، قالعانى ءتۇرلى سەبەپپەن اليمەنت تولەۋدەن جالتارۋدا»، - دەدى سپيكەر.
اليمەنت تولەۋدەن جالتارىپ جۇرگەندەرگە قاتىستى شەت ەلگە شىعۋعا، بانك وپەراسيالارىن جاساۋعا، شوتتارىنداعى قاراجاتتى پايدالانۋعا، مۇلىككە تىيىم سالۋ سياقتى شەكتەۋلەر قويىلعان. سونىمەن بىرگە جۇمىسسىز بورىشكەرلەردى تۇراقتى تۇردە جۇمىسپەن قامتۋ شارالارى قاراستىرىلۋدا.
«وسى تۇرعىدا انا مەن بالاعا قاتىستى قۇقىقبۇزۋشىلىققا جول بەرگەن تۇلعالاردىڭ جاۋاپكەرشىلىگىن كۇشەيتۋ ءۇشىن بىرنەشە زاڭعا وزگەرىستەر مەن تولىقتىرۋلار ەندى. كەي بورىشكەرلەر بالانىڭ كامەلەت جاسىنا تولعانىن كۇتىپ، بەرەشەكتەن قۇتىلامىن دەگەن ويمەن اليمەنت تولەمەۋى مۇمكىن. بالانىڭ كامەلەت جاسىنا تولعانى بورىشكەردى بەرەشەكتەن بوساتپايدى. ەرلى-زايىپتىنىڭ ويلارى مەن ماقساتتارى ءبىر ارناعا توعىسپاي اجىراسۋىنا بالا كىنالى ەمەس. سول سەبەپتى، انا قولىندا قالعان ۇرپاعىنا اكەسىنىڭ مورالدىق، ماتەريالدىق جاردەم كورسەتۋى – ونىڭ پارىزى. ەگەمەندى ەلىمىزدىڭ ەرتەڭگى بولاشاعى – جاس ۇرپاق. بالانىڭ ءبىلىمدى، دەنساۋلىعى مىقتى ازامات بولىپ ءوسۋى ءۇشىن اتا-انا نەكەسىن بۇزسا دا، تەڭدەي قامقورلىق جاساعانى ابزال»، - دەيدى داميليا حاميتوۆا ءوز سوزىندە.