ءلاززات تانىسباي "قازاقستان" تەلەراديوكورپوراسياسىنىڭ باسقارما ءتوراعا قىزمەتىنەن كەتتى، - دەپ حابارلايدى aqshamnews.kz ءتىلشىسى.
"بىرگە قىزمەت ەتكەن ارىپتەستەرىمە العىس ايتا وتىرىپ، باسقارما ءتورايىمى رەتىندەگى قىزمەتىمدى اياقتاۋدى ءجون سانادىم. التى جىلدان استام ۋاقىتتا ەڭ مىقتى، كاسىبي ۇجىممەن بىرگە جاۋاپتى كەزەڭدەردى ەڭسەرىپ، ماقسات ەتىپ قويعان جوبالاردى جۇزەگە اسىردىق. كورپوراسيانىڭ قازىرگى ۋاقىتتاعى جەتىستىكتەرى ارىپتەستەرىمنىڭ ءوز ىسىنە ادالدىعى مەن تىنىمسىز ەڭبەگىنىڭ جەمىسى. وسى كەزەڭدە قىزمەتكەرلەردىڭ الەۋمەتتىك جاعدايىن جاقسارتىپ، كاسىبي دامۋىنا قولايلى ورتا قالىپتاستىرۋعا تىرىستىم. سەبەبى جايلى ەڭبەك ورتاسى ناتيجەلى جۇمىستىڭ، تۇراقتىلىق پەن تابىستىڭ نەگىزى دەپ ەسەپتەيمىن. قازاق تەليەۆيزياسىنىڭ قاراشاڭىراعى سانالاتىن ۇيىمدا بۇعان دەيىن تالاي جەتەكشىلەردىڭ وزىنە لايىق قولتاڭباسى قالدى. بۇل ساباقتاستىق جالعاسىن تابۋى قاجەت. ۋاقىتپەن بىرگە باسشىلاردىڭ دا الماسىپ، ۇيىم جۇمىسىنا جاڭا تىنىس، جاڭا سەرپىن بەرىلىپ وتىرۋى كەرەك دەپ ەسەپتەيمىن.
بۇل شەشىمىمە قولداۋ بىلدىرگەن سالا مينيسترىنە العىس ايتامىن. مەن ءارى قاراي دا وتاندىق تەليەۆيزيا سالاسىنىڭ دامۋىنا ەڭبەك ەتەمىن"، - دەدى ءلاززات تانىسباي بۇگىن كورپوراسيا جەتەكشىلەرىمەن وتكەن كەزدەسۋىندە.
تانىسباي "قازاقستان" رەسپۋبليكالىق تەلەراديوكورپوراسياسىن 2019 جىلدىڭ ساۋىردەن بەرى باسقارىپ كەلدى. كورپوراسيا وسى جىلدار ارالىعىندا ايتارلىقتاي جەتىستىكتەرگە جەتتى جانە بۇل كورسەتكىشتەر ۇجىم ءۇشىن وتە ماڭىزدى. التى جىل ىشىندە كورپوراسيانىڭ تەلە جانە راديو ارنالارىنىڭ رەيتينگى ءوسىپ، كوممەرسيالىق تابىسى 50 پايىزعا ارتتى.
"Qazaqstan" ارناسى وسى كەزەڭدە ۇلتتىق مازمۇنىن ساقتاي وتىرىپ، قوعامدىق-ساياسي فورماتتاعى باعدارلامالارعا باسىمدىق بەردى. بۇل باعىتتا "اشىق الاڭ"، "باس تاقىرىپ"، "قوس پالاتا"، "الەم جانە ءبىز" سىندى جاڭا ساراپتامالىق جانە قوعامدىق-ساياسي حابارلار ەفيرگە شىعىپ، اشىق پىكىر الاڭدارى قالىپتاستى.
وتاندىق مەديادا العاش رەت جاڭا فورماتتاعى جوبالار ۇيىمداستىرىلا باستادى. ولاردىڭ قاتارىندا تىكەلەي ەفيردە وتكەن، ينفوتەينمەنت ۇلگىسىندەگى كوپساعاتتىق ونلاين مارافوندار بار.
كورپوراسيا وسى جىلدار ىشىندە تاريحي تۇلعالارعا ارنالعان تەلەحيكايالار تۇسىرۋگە دەن قويدى. اباي قۇنانباي ۇلى، احمەت بايتۇرسىن ۇلى، ماعجان جۇمابايەۆ، ءمىرجاقىپ دۋلات ۇلى، الكەي مارعۇلان، قانىش ساتبايەۆ، دينا نۇرپەيىسوۆا، ءال-فارابي، قورقىت جانە وزگە دە تاريحي تۇلعالار مەن وقيعالارعا ارنالعان 22 سەريال ءتۇسىرىلدى. سولاردىڭ ءبىرى "ءمىرجاقىپ. ويان، قازاق!" تەلەحيكاياسى كورەرمەننىڭ جوعارى قىزىعۋشىلىعىنا يە بولىپ، ءوز الدىنا مادەني فەنومەنگە اينالدى. سونىمەن قاتار قازاق قالامگەرلەرى سايىن مۇراتبەكوۆتىڭ، بەردىبەك سوقپاقبايەۆتىڭ، ءازىلحان نۇرشايىقوۆتىڭ "جابايى الما"، "ون التى جاسار چەمپيون"، "ماحاببات، قىزىق مول جىلدار" ادەبي تۋىندىلارى ەكرانيزاسيالاندى، قۇسني-قورلان ءانىنىڭ شىعۋ تاريحى باياندالاتىن "ەستاي مەن قورلان" تەلەحيكاياسى ءتۇسىرىلدى.
كورپوراسيا وندىرگەن انيماسيالىق فيلمدەر كينوپروكاتقا شىعا باستادى. "Balapan" تەلەارناسىنىڭ 15 جىلدىعىنا وراي "شوقان. قاشقارياعا ساپار"، "جەلاياق"، "توقتى مەن سەركە" انيماسيالىق تۋىندىلارى ۇلكەن ەكراندارعا شىقتى.
وسى جىلدار ىشىندە قوعامداعى وزەكتى تاقىرىپتاردى قامتىعان 300-گە جۋىق دەرەكتى فيلم ءتۇسىرىلدى. ولاردىڭ اراسىندا مەملەكەت تاريحىنداعى العاشقى دارىگەر، ءمۇعالىم ايەلدەر اققاعاز دوسجانوۆا، گۇلسىم اسفەندياروۆا، ءنازيپا قۇلجانوۆا، حۇسني-جامال نۇرلىحانوۆانىڭ تاعدىرىنا ارنالعان "قازاق قىزى"، ءار ءداۋىردىڭ ۇلى تۇلعالارىنا قاتىستى "ءداۋىر دانالارى"، ءتۇرلى سالادا ايتۋلى ەڭبەگىمەن تانىلعان قازاقستاندىقتارعا ارنالعان "بىرەگەي" دەرەكتى فيلمدەر توپتاماسى بار
2020 جىلى ءلاززات تانىسبايدىڭ جەتەكشىلىگىمەن كورپوراسيا قۇرامىندا مادەني-اعارتۋ باعىتىنداعى "Abai TV" تەلەارناسى ىسكە قوسىلدى. پاندەميا كەزىندە شاعىن قۇراممەن جۇمىسىن باستاعان ارنا بۇگىندە تاۋلىگىنە 17 ساعات حابار تاراتىپ، وتاندىق جانە الەمدىك ونەر مەن مادەنيەتتىڭ ءتۇرلى سالالارىنا ارنالعان تەلەجوبالار ءوندىرىپ جاتىر.
وتاندىق كونتەنتتى حالىقارالىق اۋديتورياعا جەتكىزۋ جۇمىستارى دا قارقىن الدى. 2023 جىلدان باستاپ "Qazaqstan" جانە "Balapan" تەلەارنالارى وزبەكستان، قىرعىزستان، موڭعوليا مەملەكەتتەرىنىڭ اۋماعىنا تاراتىلا باستادى.
ديدجيتال باعىتىندا بىرنەشە ءىرى جوبا جۇزەگە اسىرىلدى: altynqor.com سايتى، "Birge.tv" ستريمينگتىك پلاتفورماسى مەن ءتۇرلى تاقىرىپتىق باعىتتار بويىنشا 10 ۆەب-تەلەارنا ىسكە قوسىلدى. "التىن قورداعى" 1500 ان-كۇي مەن فولكلورلىق اۋديوشىعارمالار 100-دەن استام الەمدىك مۋزىكالىق پلاتفورمالارعا جۇكتەلىپ، جيناق رەتىندە جارىققا شىقتى. جاساندى ينتەللەكت كومەگىمەن قازاق ەرتەگىلەرى نەگىزىندە انيماسيالىق فيلمدەر شىعارىلا باستادى.
سپورتتىق ترانسلياسيالاردى تاراتۋشى نەگىزگى مەدياۇيىم رەتىندە كورپوراسيا كوممەنتاتورلار مەن سپورت جۋرناليستەرىنە ارنالعان "كوممەنتاتور سوزدىگىن"، جۋرناليستەرگە ارنالعان كاسىبي ەتيكا ستاندارتتارىنان تۇراتىن "رەداكسيا ستاندارتى" نۇسقاۋلىعىن شىعاردى.
ءلاززات تانىسبايدىڭ باستاماسىمەن كورپوراسيا جانىنان بولاشاق تەليەۆيزيا ماماندارىنا ارنالعان مەديامەكتەپ ىسكە قوسىلىپ، ءتورت جىل ىشىندە 123 ستۋدەنت تەگىن ءبىلىم الىپ شىقتى. ونىڭ ىشىندە 24 ستۋدەنت كورپوراسياعا جۇمىسقا قابىلداندى.
ۇجىم ءۇشىن ماڭىزدى كورسەتكىشتەردىڭ ءبىرى - وسى جىلدار ىشىندە كورپوراسيادا جەتەكشىلىك قىزمەتتەرگە تاعايىنداۋ مەريتوكراتيالىق تاسىلمەن جۇزەگە اسىرىلدى. ۇجىمدا ۇزاق جىلداردان بەرى قىزمەت ەتىپ جۇرگەن جانە ناتيجەلى ەڭبەگىمەن ەرەكشەلەنگەن 100-دەن استام قىزمەتكەر جەتەكشىلىك لاۋازىمدارعا تاعايىندالدى.
ءلاززات تانىسباي جاڭا قىزمەتكە تاعايىندالدى
ءلاززات تانىسباي بۇگىننەن باستاپ "ەۆرازيا" ءبىرىنشى ارناسىنا" جەتەكشىلىك ەتەدى.
"ەۆرازيا" ءبىرىنشى ارناسى" 1997 جىلدان بەرى جۇمىس ىستەپ كەلە جاتقان رەسپۋبليكالىق تەلەارنا. كۆازيمەملەكەتتىك مەدياۇيىم بۇكىل قازاقستان اۋماعىندا قازاق جانە ورىس تىلدەرىندە حابار تاراتادى. كورەرمەندەر اۋقىمى بويىنشا وتاندىق تەلەارنالار اراسىندا العاشقى ۇشتىككە كىرەدى.
ءلاززات مۇرات قىزى تانىسبايعا "قازاقستان" تەلەراديوكورپوراسياسىن دامىتۋ جولىنداعى قاجىرلى قىزمەتى مەن ۇجىم ىشىندە ادالدىق، ادىلدىك پرينسيپتەرىن قالىپتاستىرۋعا سىڭىرگەن ەڭبەگى ءۇشىن ۇجىم اتىنان شىنايى العىسىمىزدى ءبىلدىرىپ، جاڭا قىزمەتىنە تابىس پەن جەتىستىكتەر تىلەيمىز.