قازاقستان قىزىلشانىڭ تارالۋىنان ءبىرىنشى ورىندا تۇر

بۇل تۋرالى دەنساۋلىق ساقتاۋ ءمينيسترى اقمارال ءالنازاروۆا مالىمدەدى.

قازاقستان قىزىلشانىڭ تارالۋى جاعىنان الەم بويىنشا ءبىرىنشى ورىنعا شىقتى، دەپ حابارلايدى Almaty-akshamy.kz

قىزىلشانى ۆاكسينامەن توقتاتۋعا بولادى. ءبىراق بۇگىندە قازاقستاندا ۆاكسينامەن باسقارىلاتىن ينفەكسيالىق اۋرۋلاردى ەپيدەميولوگيالىق باقىلاۋ جاعىنان جۇيەلى كەمشىلىكتەر بار.

ونى دەنساۋلىق ءمينيسترى دە مويىنداپ وتىر. وسى ورايدا ءالنازاروۆا ينفەكسيالىق اۋرۋلاردى بولجامداۋ جانە باقىلاۋ جۇيەسىن كۇشەيتۋ ءۇشىن ءبىرقاتار شارالاردى اتقارۋ قاجەت دەپ سانايدى.

“ناقتى ۋاقىت فورماتىندا تەمپەراتۋرالىق رەجيمدى باقىلاۋ مۇمكىندىگىمەن پروفيلاكتيكالىق ەگۋلەر مەن ۆاكسينالار قوزعالىسىن ەسەپكە الۋدى سيفرلاندىرۋدى قامتاماسىز ەتۋ، دەنساۋلىق ساقتاۋدىڭ بارلىق دەڭگەيلەرىندە مەديسينا قىزمەتكەرلەرىن وقىتۋدى جولعا قويۋ، مۇددەلى ورگاندارمەن جانە ۆەدومستۆولارمەن بىرلەسىپ باسقارىلاتىن ينفەكسيالاردىڭ پروفيلاكتيكاسىندا ۆاكسيناسيالاۋدىڭ ماڭىزدىلىعى تۋرالى حالىقتى كەڭىنەن حاباردار ەتۋدى قامتاماسىز ەتۋ قاجەت دەپ سانايمىن”، - دەدى ءالنازاروۆا مينيسترلىكتىڭ كەڭەيتىلگەن القا ماجىلىسىندە.

ايتا كەتەرى، بۇعان دەيىن استانانىڭ باس سانيتارلىق دارىگەرى سارحات بەيسەنوۆا ەرەسەكتەر اراسىندا قىزىلشانىڭ ءورشىپ تۇرعانىن مالىمدەدى.