«جاڭا قازاقستان» توبى قۇرىلاتىن بولدى.
بۇگىن ءماجىلىستىڭ جالپى وتىرىسىندا دەپۋتات ەدىل جاڭبىرشين «جاڭا قازاقستان» اتتى دەپۋتاتتىق توپ قۇرىلاتىنىن جاريا ەتتى، دەپ حابارلايدى Almaty-akshamy.kz قازاقپارات cىلتەمە جاساپ.
مۇنداي باستاما كوتەرگەن پارلامەنت دەپۋتاتتارىنىڭ پىكىرىنشە، مەملەكەت باسشىسىنىڭ باستامالارىن ءبىراۋىزدان قولداۋ قاجەت.
«پرەزيدەنتىمىزدىڭ قازاقستاندى جاڭارتامىن، دۇرىس ارناعا بۇرامىن دەگەن اق نيەتى بار. ال ءبىز ەل بولىپ ونى ءبىراۋىزدان قولداۋىمىز قاجەت! وزدەرىڭىزگە ءمالىم، قاڭتاردىڭ 11 جۇلدىزىندا پرەزيدەنت پارلامەنت ءماجىلىسىنىڭ جانە كەشەگى ۇكىمەتتىڭ وتىرىسىندا ەلىمىزدە اتقارىلاتىن ءبىراز ماڭىزدى ماسەلەلەردى ايقىنداپ، ناقتى مىندەتتەردى قويدى. جالپى، قوعام مەن مەملەكەت اراسىنداعى قارىم-قاتىناستا ترانسفورماسيانىڭ قاجەتتىلىگى تۋىنداعانىن جانە «جاڭا قازاقستاندى» قۇرۋ تۋرالى قاسىم-جومارت كەمەل ۇلى قايتا-قايتا ايتىپ ءجۇر. مۇنداي كەشەندى ترانسفورماسيا ەڭ الدىمەن پارلامەنت قىزمەتىندە ورىن الىپ، ءماجىلىس قابىرعاسىنان باستالۋى شارت»، - دەدى دەپۋتات ەدىل جاڭبىرشين.
ءماجىلىستىڭ ءبىرقاتار دەپۋتاتى جاڭا باستاماعا قولداۋ بىلدىرگەن.
«سوندىقتان پارلامەنتتىڭ تومەنگى پالاتاسىنداعى جۇمىستاردى جاڭا دەڭگەيگە كوتەرىپ جانە پرەزيدەنتتىڭ تاپسىرمالارىن ءماجىلىس دەپۋتاتتارى تاراپىنان قاداعالاۋ ماقساتىندا «جاڭا قازاقستان» اتتى دەپۋتاتتىق توپتى قۇرۋدى رەسمي تۇردە جاريالايمىز! «جاڭا قازاقستان» دەپۋتاتتىق توبى قوعامداعى ەڭ وزەكتى ماسەلەلەردى دەر كەزىندە پارلامەنت تورىندە كوتەرىپ، تۇرعىنداردىڭ مۇڭ-مۇقتاجدارىن ۋاقىتىندا شەشىۋگە قىزمەت ەتەدى. ۇكىمەتپەن بىرلەسىپ، حالىقتىڭ رۋحانياتىن كۇشەيتەتىن، ءال-اۋقاتىن جاقسارتاتىن زاڭ جوبالارىن دايىنداۋعا، سايلاۋشىلارىمىزبەن ودان ءارى تىعىز قارىم-قاتىناستار ورناتۋعا مۇددەلى. «جاڭا قازاقستان» دەپۋتاتتىق توپتىڭ قوعامداعى بارلىق بەلسەندى ساياسي پارتيالارمەن، نارازى توپتارمەن، ۇكىمەتتىك ەمەس ۇيىمدارمەن جانە ساراپشىلارمەن قويان-قولتىق قىزمەت جاساۋعا ىنتالى جانە دايىن ەكەنىن ءمالىم ەتەمىز. قازاقتا «بىرلەسىپ كوتەرگەن جۇك جەڭىل» دەگەن ءسوز بار! جاڭا قازاقستاننىڭ جۇگىن ۇلىس بولىپ بىرگە كوتەرەيىك! پرەزيدەنت باستاعان رەفورمالاردى سابوتاجعا جىبەرمەي، اياعىنا دەيىن جەتكىزەيىك! بارشاڭىزدى ءلدىڭ ىرگەسىن نىعايتۋعا شاقىرامىز!» - دەدى ەدىل جاڭبىرشين.
