ەۋروپالىق جانە جەرورتا تەڭىزى وسىمدىكتەردى قورعاۋ جانە كارانتين ۇيىمىنىڭ (ەررو) جۇمىس توبىنىڭ 55-وتىرىسى اياسىندا ق ر اشم اگروونەركاسىپتىك كەشەندەگى مەملەكەتتىك ينسپەكسيا كوميتەتى ءتوراعاسىنىڭ مىندەتىن اتقارۋشى ساكەن قانىبەكوۆ وزبەكستان مەن قىرعىزستاننىڭ فيتوسانيتاريالىق قىزمەتتەرى باسشىلارىمەن كەزدەسۋ وتكىزدى.
كەزدەسۋدىڭ باستى تاقىرىبى – شەگىرتكەگە قارسى كۇرەس شارالارى بولدى. تاراپتار ماۋسىمدىق زيانكەستەرگە قارسى ءتيىمدى كۇرەس جۇرگىزۋ تاجىريبەسىمەن تانىستى، دەپ حابارلايدى aqshamnews.kz.
كەزدەسۋ بارىسىندا Locust.uz جۇيەسى تانىستىرىلدى. بۇل – شەگىرتكەلەر جۇمىرتقا سالعان اۋماقتار مەن حيميالىق وڭدەۋ جۇرگىزىلگەن جەرلەر تۋرالى مالىمەتتەر ەنگىزىلەتىن ەلەكتروندى پلاتفورما. جۇيە جاعدايدى دۇرىس باعالاۋعا مۇمكىندىك بەرەدى. سونىمەن قاتار، جۇيە GPS قۇرىلعىلارى ارقىلى ارنايى تەحنيكانىڭ قوزعالىسىن قاداعالاپ وتىرادى. بۇل شەگىرتكەنىڭ كەڭ اۋماقتارعا تارالۋىنا جول بەرمەي، جەدەل شارا قولدانۋعا جاعداي جاسايدى.
كەلىسسوزدەردىڭ قورىتىندىسى بويىنشا تاراپتار ىنتىماقتاستىقتى ودان ءارى نىعايتۋ، حالىقارالىق فيتوسانيتاريالىق ستاندارتتاردى ەنگىزۋ جانە اقپارات الماسۋدى دامىتۋ جونىندە ۋاعدالاستى.
تاراپتار شەكارا ماڭىنداعى ايماقتاردا شەگىرتكەگە قارسى كۇرەس، فيتوسانيتاريالىق جاعداي، زەرتتەۋ ناتيجەلەرى، زياندى اعزالاردىڭ تارالۋى جانە جۇرگىزىلىپ جاتقان ءىس-شارالار تۋرالى جەدەل مالىمەت الماسۋعا ەرەكشە نازار اۋداراتىن بولادى.
سونداي-اق فيتوسانيتاريالىق سەرتيفيكاتتار بويىنشا ءتيىمدى ءارى تۇراقتى دەرەكتەر الماسۋدى قامتاماسىز ەتۋ ماقساتىندا اقپاراتتىق جۇيەلەردى بىرىكتىرۋ جوسپارلانۋدا.
اتالعان ىنتىماقتاستىق وڭىردەگى اۋىل شارۋاشىلىعىنىڭ قاۋىپسىزدىگىن ارتتىرۋعا جانە قاتىسۋشى ەلدەردىڭ ازىق-تۇلىك قاۋىپسىزدىگىن قامتاماسىز ەتۋگە باعىتتالعان.