1 مەن 30 ماۋسىم ارالىعىندا، قازاقستان پوليسياسى كۇنىنە وراي وتكىزىلىپ جاتقان رەسپۋبليكالىق "زاڭ جانە ءتارتىپ" ايلىعى اياسىندا الماتىدا "اڭشى مەن بالىقشى – تازا تابيعات ءۇشىن" اتتى ەكولوگيالىق ناۋقان باستالدى.
بۇل تۋرالى Aqshamnews.kz Polisia.kz-كە سىلتەمە جاساي وتىرىپ حابارلايدى.
اۋقىمدى شارانىڭ ماقساتى — قورشاعان ورتاعا جاۋاپكەرشىلىكپەن قاراۋ مادەنيەتىن قالىپتاستىرۋ، اڭشىلىق جانە سۋ قويمالارى اۋماقتارىنىڭ لاستانۋ ماسەلەلەرىنە نازار اۋدارۋ، سونداي-اق تابيعي بايلىقتى قورعاۋ باعىتىندا ازاماتتىق ۇستانىمدى نىعايتۋ.
ناۋقان بارىسىندا الماتى قالاسى پوليسيا دەپارتامەنتىنىڭ قىزمەتكەرلەرى مەملەكەتتىك ورگاندار، اڭشىلار مەن بالىقشىلاردىڭ قوعامدىق بىرلەستىكتەرى، سونداي-اق قارۋ اينالىمى سالاسىندا جۇمىس ىستەيتىن ۇيىمدارمەن بىرلەسىپ تۇرعىندارمەن ءتۇسىندىرۋ كەزدەسۋلەرىن وتكىزدى. تابيعات اياسىندا ءجۇرىپ-تۇرۋ ەرەجەلەرى تانىستىرىلىپ، اڭشىلىق القاپتار مەن سۋ جاعالاۋلارى تۇرمىستىق قالدىقتاردان تازارتىلدى.
– 2025 جىل ىشكى ىستەر مينيسترلىگى جۇيەسىندە "پروفيلاكتيكا جىلى" دەپ جاريالاندى. ءبىزدىڭ مىندەتىمىز – قۇقىق بۇزۋشىلىقتاردى بولدىرماۋمەن قاتار، ازاماتتاردىڭ زاڭعا، تابيعاتقا دەگەن قۇرمەتىن نىعايتۋ. تابيعات تازالىعى – بۇل دا قاۋىپسىزدىكتىڭ كەپىلى. ناۋقانعا بەلسەندى قاتىسقان ازاماتتارعا العىسىمىز شەكسىز. مۇنداي يگى باستامالار داستۇرگە اينالىپ، زاڭ مەن تارتىپكە جاناشىر جانداردى بىرىكتىرەدى دەپ سەنەمىز، – دەدى الماتى قالاسى پد اكىمشىلىك پوليسيا باسقارماسى باستىعىنىڭ ورىنباسارى دارحان ايىمبەتوۆ.
پوليسيا قىزمەتكەرلەرى بارلىق اڭشىلاردى، بالىقشىلاردى جانە تابيعاتقا بەيجاي قارامايتىن تۇرعىنداردى اتسالىسۋعا شاقىرادى.