قازاقستاندىق لوۋكوستەر FlyArystan اتا-انا قامقورلىعىنسىز قالعان ەرەكشە قاجەتتىلىكتەرى بار بالالارعا جان-جاقتى وڭالتۋ كومەگىن كورسەتۋگە باعىتتالعان «ءۇمىت» الەۋمەتتىك جوباسىن جۇزەگە اسىرۋ ءۇشىن «تەرريتوريا ۋسپەحا» قوعامدىق بىرلەستىگىنە قارجىلىق قولداۋ كورسەتتى، دەپ حابارلايدى aqshamnews.kz.
ريچارد لەدجەر، «FlyArystan» اق پرەزيدەنتى:
«مۇنداي جوبالاردى قولداۋ – ءبىزدىڭ كورپوراتيۆتىك جاۋاپكەرشىلىگىمىزدىڭ اجىراماس بولىگى. ءبىز ءۇشىن بۇل كومەكتىڭ ءبىر رەتتىك ەمەس، جۇيەلى سيپاتتا بولعانى اسا ماڭىزدى. وسى رەتتە Komek الەۋمەتتىك باعدارلاماسىنا ەرەكشە نازارىمىزدى اۋدارامىز. بۇل باعدارلاما اياسىندا ءبىرىنشى توپتاعى مۇگەدەكتىگى بار جاندار مەن ولارمەن بىرگە جۇرەتىن تۇلعالارعا اۋەبيلەتتەرىنە جەڭىلدىك ۇسىنىلادى. مۇنداي قولداۋ ولاردىڭ ەلىمىزدىڭ ءارتۇرلى وڭىرلەرىندە مەديسينالىق، ءبىلىم بەرۋ جانە الەۋمەتتىك قىزمەتتەرگە قولجەتىمدىلىگىن قامتاماسىز ەتۋگە باعىتتالعان. سونىمەن قاتار، «جۇرەك ورتالىعى» قوعامدىق قورىمەن بىرلەسكەن جوبا شەڭبەرىندە ءبىز دارىگەرلەردىڭ وڭىرلەرگە اۋەبيلەتتەرىمەن قامتاماسىز ەتىپ كەلەمىز. ءبىز ادامداردىڭ ومىرىندە ناقتى وزگەرىس اكەلەتىن، ولاردىڭ مۇمكىندىكتەرىن كەڭەيتىپ، وز-وزىنە دەگەن سەنىمىن ارتتىراتىن جانە اسا قاجەت ساتتەردە قولداۋ كورسەتە الاتىن ۇزاق مەرزىمدى ستراتەگيا قۇرۋعا ۇمتىلامىز».
بالالاردىڭ سەرەبرالدى سال اۋرۋىنا (دسپ) شالدىققان جاعدايىندا كەشەندى وڭالتۋعا باعىتتالعان «ءۇمىت» جوباسى ەمدىك دەنە شىنىقتىرۋ جاتتىعۋلارىن، وستەوپاتتار، ماسساج ماماندارى، لوگوپەدتەر جانە وزگە دە بەيىندى مامانداردىڭ قىزمەتىن قامتيدى. بۇل باستاما بالالارعا قالپىنا كەلتىرۋ ەمىن عانا ەمەس، سونداي-اق الەۋمەتتىك بەيىمدەلۋ جانە بازالىق ءبىلىم الۋ مۇمكىندىكتەرىن ۇسىنادى.
رىمگۇل ۋتەپوۆا، «تەرريتوريا ۋسپەحا» قوعامدىق بىرلەستىگىنىڭ باسقارما ءتورايىمى:
«اتالعان جوبا 2024 جىلدىڭ قازان ايىندا ىسكە قوسىلدى. FlyArystan كومپانياسىمەن «ءۇمىت» باستاماسى بويىنشا بىرلەسكەن جۇمىسىمىزدى بيىلعى جىلدىڭ ناۋرىز ايىندا، مەيىرىم مەن جاردەم ۋاقىتى – قاسيەتتى رامازان ايىندا باستادىق. اۋەكومپانيانىڭ قولداۋىمەن ءبىز سەرەبرالدى سال اۋرۋى دياگنوزى قويىلعان بالالار توبىنا ساپالى ءارى كەشەندى وڭالتۋ شارالارىن ۇيىمداستىرا الدىق. بۇل تەك مەديسينالىق جانە فيزيكالىق كومەكتى عانا ەمەس، سونىمەن قاتار بالالاردىڭ بەيىمدەلۋىنە، كوممۋنيكاسيالىق داعدىلارىن دامىتۋعا جانە وز-وزىنە سەنىم قالىپتاستىرۋعا باعىتتالعان سۇيەمەلدەۋدى دە قامتىدى. FlyArystan سىندى ءىرى سەرىكتەستەرمەن ىنتىماقتاستىق – راسىمەن دە ينكليۋزيۆتى، ءارى قامقور قوعام قۇرۋعا سەرپىن بەرەتىن ماڭىزدى قادام دەپ سەنەمىز».
2024 جىلى دا اۋەكومپانيا «تەرريتوريا ۋسپەحا» ۇيىمىنا دەمەۋشىلىك كورسەتكەن بولاتىن. اتاپ ايتقاندا، ايترەكەر ارنايى قۇرىلعىلارىن ساتىپ الۋعا كومەكتەستى. كوز قوزعالىسىن باقىلاۋ ارقىلى جۇمىس ىستەيتىن بۇل يننوۆاسيالىق قۇرىلعىلار سويلەۋ جانە قيمىل-قوزعالىس قابىلەتى اۋىر بۇزىلعان جاندارعا سيفرلىق سەرۆيستەردى باسقارۋعا مۇمكىندىك بەرەدى. ايترەكەر كوپتەگەن بالالار مەن ەرەسەكتەر ءۇشىن تولىققاندى قارىم-قاتىناس پەن دەربەستىككە باستار «كوپىرگە» اينالدى.
FlyArystan تۋرالى:
FlyArystan – Air Astana توبىنىڭ 100% ەنشىلەس كومپانياسى بولىپ تابىلاتىن قازاقستاندىق لوۋكوستەر. ول ءوز قىزمەتىن 2019 جىلدىڭ مامىر ايىندا باستادى. 2025 جىلدىڭ قاڭتار ايىنان باستاپ FlyArystan ءوز سەرتيفيكاتىمەن، FS كودى بويىنشا تاۋەلسىز اۋەكومپانيا رەتىندە قىزمەت كورسەتۋدە. اۋەكومپانيا الماتى، استانا جانە اقتاۋ قالالارىندا ورنالاسقان بازالارىنداعى زاماناۋي A320 ۇشاقتارىنان قۇرالعان اۋە پاركىمەن كەڭ اۋقىمدى مارشرۋتتار جەلىسى بويىنشا رەيستەر ورىندايدى. FlyArystan مارشرۋتتار جەلىسى ىشكى جانە حالىقارالىق رەيستەردى، سونداي-اق چارتەرلىك باعىتتاردى قامتيدى. FlyArystan 2023 جانە 2024 جىلدارى ەكى رەت Skytrax World Airline Awards تاراپىنان ورتالىق ازيا جانە تمد-نىڭ ەڭ ۇزدىك بيۋدجەتتىك اۋەكومپانياسى دەپ تانىلدى.
«تەرريتوريا ۋسپەحا» تۋرالى:
«تەرريتوريا ۋسپەحا» قوعامدىق بىرلەستىگى 2016 جىلى ەرەكشە قاجەتتىلىكتەرى بار بالالاردىڭ ەكى اناسى تاراپىنان قۇرىلدى. ۇيىم مۇمكىندىگى شەكتەۋلى بالالاردى وڭالتۋعا باعىتتالعان ينكليۋزيۆتى جانە ءبىلىم بەرۋ جوبالارىن جۇزەگە اسىرادى، وتباسىلارعا پسيحولوگيالىق جانە كەڭەستىك قولداۋ كورسەتەدى، ماماندار مەن اتا-انالارعا ارنالعان ترەنينگتەر مەن سەمينارلار وتكىزەدى، سونداي-اق كوشپەلى ءىس-شارالار مەن قايىرىمدىلىق مەرەكەلەرىن ۇيىمداستىرادى.