ءۇش ەل بىرلەسىپ روزا باعلانوۆا تۋرالى تولىقمەتراجدى فيلم تۇسىرىلمەك
وزبەكستاندا وتكەن حالىقارالىق كينوفەستيۆالدە ەلىمىز ۇسىنعان «روزا» اتتى فيلم سەنارييى جۇلدەگەر بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
الداعى ۋاقىتتا قازاقستان، وزبەكستان، فرانسيا ەلدەرى بىرلەسىپ، ءانشىنىڭ ءومىرى مەن شىعارماشىلىعىن باياندايتىن فيلم تۇسىرەتىنىن «قازاقفيلم» كينوستۋدياسىنىڭ باس رەداكتورى، كينودراماتۋرگ، كينورەجيسسەر بەكبولات شەكەروۆ ايتتى.
قىركۇيەك ايىندا تاشكەنتتە وتكەن حالىقارالىق كينوفەستيۆال اياسىندا وزبەكستانداعى فرانسيانىڭ ەلشىلىگى ۇزدىك سەنارييلەر اراسىندا «پيچينگ» ۇيىمداستىردى.
وعان «قازاقفيلم» كينوستۋدياسى 4 جوبا ۇسىندى. ولاردىڭ اراسىنان قازاقتىڭ دارا قىزى، اتاقتى ءانشىسى روزا باعلانوۆا ارنالعان «روزا» اتتى سەناريي جۇلدەگەرلەر قاتارىنان كورىندى.
«پيچينگ بارىسىندا ەڭ ۇزدىك سەنارييلەر انىقتالدى. ءبىرىنشى ورىندى تاجىكستان قانجىعالاسا، ەكىنشى ورىندى قازاقستان مەن وزبەكستان ەلدەرى ءوزارا ءبولىستى. ءبىزدىڭ «روزا» اتتى فيلمگە ارنايى جازىلعان سەنارييىمىز جوعارى باعا الدى. وسىعان وراي، وزبەكستانداعى فرانسيا ەلشىلىگى جوبانىڭ ارى قاراي فيلم بولىپ جارىققا شىعۋىنا كومەكتەسەتىنىن مالىمدەدى. تيىسىنشە، ولار ەندى الداعى ۋاقىتتا تۇسىرىلەر فيلمگە بارلىق دەرەكتەردى جيناقتاپ، ولاردى فرانسۋز پروديۋسەرلەرى مەن ينۆەستورلارعا ۇسىناتىن بولادى. سول سەبەپتى، الداعى ۋاقىتتا قازاقستان، وزبەكستان جانە فرانسيانىڭ بىرلەسۋىمەن ايگىلى ءانشى روزا ءتاجىباي قىزى جايلى تولىقمەتراجدى فيلم جارىققا شىعادى دەپ ويلاپ وتىرمىز»، - دەدى بەكبولات شەكەروۆ.
ايگىلى ءانشى تۋرالى فيلم سەنارييى ناقتى فاكتىلەر مەن وقيعالارعا نەگىزدەلگەن، ول ءانشىنىڭ تاعدىرىن باياندايتىن «بايوپيك» جانرىنداعى فيلم بولماق.
«كينوكارتينا جەلىسى 1980 جىلى 15 ساۋىردە روزا ءتاجىباي قىزىنىڭ سول كەزدەگى لەنين سارايىندا كونسەرت بەرىپ تۇرعان كەزىنەن باستالادى. ياعني، ول ساحنادا ءان ايتىپ تۇرعان كەزدە، كوزى قاراۋىتىپ، اينالاسىن كورمەي قالادى. كەيىن دارىگەر انىقتاعانداي، 1943 جىلى مايداندا جارىلعان سناريادتىڭ ۇشقىنى ونىڭ باسىندا قالىپ قويعان. سول سەبەپتى كوزدەرى كورمەي قالعان. جالپى، روزا اپامىز شىعارماشىلىق ءومىر جولىن تاشكەنت قالاسىنان باستاعان. 1941 جىلى وسى جەردەن تاشكەنت فيلارمونياسىنىڭ قۇرامىندا مايدانعا اتتانادى. قان مايداننان ورالعان سوڭ، كەڭەس ۇكىمەتى كەزىندە ارال تەڭىزىنىڭ ماسەلەسىن العاشقىلاردىڭ ءبىرى بولىپ كوتەردى، 1986 جىلعى كوتەرىلىستە الاڭعا جۇگىرىپ شىعىپ، ستۋدەنتتەردى سولداتتاردىڭ ۇرىپ-سوعۋىنان قۇتقارۋعا تىرىسقانىن ايتتىم. جالپى، فيلم جايلى ماتەريال جيناپ، سەناريي جازۋعا، جوبانى دايىنداۋعا ەكى جىل ۋاقىت كەتتى. نەگىزى روزا ءتاجىباي قىزى تۋرالى بۇگىنگە دەيىن كوپتەگەن سەريال، دەرەكتى فيلمدەر شىققان. الايدا، ازىرگە ونىڭ جەكە وزىنە ارنالعان ەشقانداي كوركەم فيلم جارىققا شىقپاعان»، - دەدى كينورەجيسسەر.