«باقىتتى وتباسىنان» جالعىزباستى انالار نەگە شىعىپ قالدى؟

سەبەبى، اجىراسقاندار سانى كوبەيىپ كەتكەن.

«باقىتتى وتباسى» باعدارلاماسىنان تولىق ەمەس وتباسى ساناتى الىنىپ تاستالدى، دەپ حابارلايدى Almaty-akshamy.kz

بۇل تۋرالى يندۋستريا جانە ينفراقۇرىلىمدىق دامۋ مينيسترلىگى (ييدم) قۇرىلىس جانە تۇرعىن ۇي-كوممۋنالدىق شارۋاشىلىق ىستەرى كوميتەتى ءتوراعاسىنىڭ ورىنباسارى باۋىرجان قابدول ايتتى.

تالداۋ ناتيجەسىن ەسكەرىپ، وتباسى ينستيتۋتىن ساقتاۋ جانە ىنتالاندىرۋ ءۇشىن «باقىتتى وتباسى» باعدارلاماسىنان تولىق ەمەس وتباسى ساناتى الىنىپ تاستالدى. سونداي-اق باسىم ساناتتار بويىنشا ءبىرىڭعاي ءتاسىل قاعيداتى ەسكەرىلىپ، جەتىم بالالار، 1-2 توپتاعى مۇگەدەكتەر ەنگىزىلدى. جۇرگىزىلگەن مونيتورينگ «باقىتتى وتباسى» ىسكە قوسىلعان ساتتەن باستاپ، اكىمدىكتەردە تولىق ەمەس وتباسى ساناتى بويىنشا كەزەككە تۇرعاندار سانى 61،6 مىڭ ادامعا (72%) ارتقانىن كورسەتتى. بۇل باسقا ءۇي كەزەگىندە تۇرعاندار ءۇشىن تەڭ ەمەس جاعداي تۋدىردى، - دەدى باۋىرجان قابدول.

ونىڭ ايتۋىنشا، اتالعان باعدارلاما بويىنشا وتىنىشتەردىڭ 50%-دان استامى تولىق ەمەس وتباسىلاردان كەلىپ تۇسكەن. ونىڭ 35%-ى جەڭىلدەتىلگەن قارىز العان.

سونداي-اق كوميتەت ءتوراعاسى 2019 جىلى «باقىتتى وتباسى» ىسكە قوسىلعاننان كەيىن ەلدە اجىراسۋ كورسەتكىشى كۇرت كوبەيگەنىن اتاپ ءوتتى.