ق ر ەڭبەك جانە حالىقتى الەۋمەتتىك قورعاۋ ۆيسە-مينيسترى اسقاربەك ەرتايەۆ ۇلىبريتانيا جانە سولتۇستىك يرلانديا بىرىككەن كورولدىگىنىڭ ەڭبەكتەگى قاناۋ مەن زاڭنامانى بۇزۋعا قارسى ءىس-قيمىل قىزمەتىنىڭ (GLAA) وكىلدەرى كولين نورتون جانە نيەۆيلل برەدبەريمەن كەزدەسۋ وتكىزدى. كەلىسسوزدەر بارىسىندا تاراپتار ۇلىبريتانياعا ماۋسىمدىق جۇمىستارعا باراتىن قازاقستان ازاماتتارىنىڭ قۇقىقتارىن قورعاۋ سالاسىنداعى ىنتىماقتاستىق ماسەلەلەرىن، ونىڭ ىشىندە ق ر ۇلتتىق زاڭناماسىن ەسكەرە وتىرىپ، قازاقستاندىق ازاماتتاردى جەكە جۇمىسپەن قامتۋ اگەنتتىكتەرى ارقىلى اكەتۋ ۇلگىسىن تالقىلادى، دەپ حابارلايدى aqshamnews.kz.
اسقاربەك ەرتايەۆ ەلدەن تىس جەرلەردە جۇمىس ىستەيتىن قازاقستان ازاماتتارىنىڭ قۇقىقتارى مەن زاڭدى مۇددەلەرىن قامتاماسىز ەتۋ ق ر ەڭبەك جانە حالىقتى الەۋمەتتىك قورعاۋ مينيسترلىگى (بۇدان ءارى – ەڭبەكمينى) قىزمەتىنىڭ باسىم باعىتتارىنىڭ ءبىرى بولىپ تابىلاتىنىن اتاپ ءوتتى.
«ۇلىبريتانيانىڭ ەڭبەكشىلەردىڭ زاڭدى قۇقىقتارى مەن مۇددەلەرىن قامتاماسىز ەتۋ سالاسىنداعى ءتيىمدى ءوزارا ءىس-قيمىلدى دامىتۋعا، اتاپ ايتقاندا، ەڭبەكمينى مەن GLAA اراسىنداعى ىنتىماقتاستىق تۋرالى مەموراندۋمعا قول قويۋعا قوسقان ۇلەسىن اتاپ وتكىم كەلەدى.
ءبىز قازاقستاندىقتاردىڭ جۇمىسپەن قامتىلۋىنا جانە ولاردىڭ قابىلداۋشى مەملەكەتتىڭ ەڭبەك نارىعىنا تابىستى ينتەگراسيالانۋىنا قولايلى جاعدايلار جاساۋ ءبىزدىڭ ەلدەرىمىز اراسىنداعى جاۋاپتى جانە ءوزارا ءتيىمدى ىنتىماقتاستىقتىڭ اجىراماس بولىگى بولىپ تابىلادى دەپ سانايمىز»، – دەدى ول.
2023-2027 جىلدارعا ارنالعان ق ر كوشى-قون ساياساتىنىڭ تۇجىرىمداماسىن ىسكە اسىرۋ شەڭبەرىندە جەكە جۇمىسپەن قامتۋ اگەنتتىكتەرىنىڭ قىزمەتىن رەتتەۋ تەتىكتەرى قايتا قارالدى – قازاقستان ازاماتتارىنىڭ شەتەلدەگى ەڭبەك قىزمەتىن ۇيىمداستىرۋ بويىنشا ولاردىڭ ەڭبەك موبيلدىلىگى ورتالىقتارىمەن ءوزارا ءىس-قيمىل الگوريتمى بەكىتىلدى جانە ىسكە اسىرىلۋدا.
ءوز كەزەگىندە GLAA وكىلدەرى ساپار، ۆيزاعا ءوتىنىش بەرۋ تۋرالى تولىق اقپارات الۋ ءراسىمى تۋرالى، سونداي-اق قازاقستاندىق ازاماتتاردىڭ ۇلىبريتانياعا ماۋسىمدىق جۇمىستارعا بارۋىن ۇيىمداستىرۋ پروسەسىندەگى وزگە دە ماڭىزدى ساتتەر تۋرالى ايتىپ بەردى.
كەزدەسۋ سوڭىندا تاراپتار ۇلىبريتانيادا جۇمىس ىستەۋدى جوسپارلاپ وتىرعان قازاقستان ازاماتتارىنىڭ ەڭبەك قۇقىقتارى مەن مۇددەلەرىن قورعاۋ ماقساتىندا ىنتىماقتاستىق پەن ءوزارا ءىس-قيمىلدى ودان ءارى دامىتۋ تۋرالى ۋاعدالاستى.
ەستەرىڭىزگە سالا كەتەيىك، وسى جىلدىڭ 11 اقپانىندا لوندوندا وتكەن «قازاقستان – ۇلىبريتانيا» ستراتەگيالىق ديالوگى اياسىندا ەڭبەكمينى مەن GLAA اراسىندا ىنتىماقتاستىق تۋرالى مەموراندۋمعا قول قويىلدى. قۇجات تاراپتاردىڭ ەڭبەك كوشى-قونى سالاسىنداعى ءوزارا ءىس-قيمىلىن كوزدەيدى.