26-27 قاراشا كۇندەرى اشحاباد قالاسىندا ق ر كولىك ۆيسە-مينيسترى تالعات لاستايەۆ جانە تۇركىمەنستان مينيسترلەر كابينەتى جانىنداعى كولىك جانە كوممۋنيكاسيا اگەنتتىگى باس ديرەكتورىنىڭ ورىنباسارى باتىر اننايەۆتىڭ تەڭ توراعالىعىمەن كولىك، ترانزيت جانە لوگيستيكانى دامىتۋ ماسەلەلەرى جونىندەگى قازاقستان-تۇركىمەنستان بىرلەسكەن جۇمىس توبىنىڭ ءبىرىنشى وتىرىسى ءوتتى، دەپ حابارلايدى Almaty-akshamy.kz.
جۇمىس توبىنىڭ وتىرىسى شەڭبەرىندە كولىك، ترانزيت جانە لوگيستيكا سالاسىنداعى ىنتىماقتاستىق ماسەلەلەرى تالقىلاندى. سونداي-اق وتىرىس قورىتىندىسى بويىنشا قازاقستان رەسپۋبليكاسىنىڭ كولىك مينيسترلىگى مەن تۇرىكمەنستان مينيسترلەر كابينەتى جانىنداعى كولىك جانە كوممۋنيكاسيالار اگەنتتىگى اراسىندا كولىك سالاسىنداعى ءوزارا بايلانىس تۋرالى مەموراندۋمعا قول قويىلدى.
مەموراندۋم ەكى ەل اراسىنداعى تەمىرجول جانە تەڭىز كولىگى سالاسىنداعى ىنتىماقتاستىقتى كەڭەيتۋدى كوزدەيدى. اتاپ ايتقاندا، قولايلى تاريفتىك جاعدايلار جاساۋ، ينفراقۇرىلىمدى دامىتۋدى ۇندەستىرۋ، ءوزارا اقپاراتپەن الماسۋ ءۇشىن سيفرلىق شەشىمدەردى ەنگىزۋ جونىندە بىرلەسكەن شارالار قابىلداۋدى قوسا العاندا، ەكى ەلدىڭ اۋماقتارى بويىنشا تاسىمالداۋ كولەمىن ارتتىرۋ ماسەلەلەرى قامتىلاتىن بولادى.
سونىمەن قاتار جۇمىس توبىنىڭ وتىرىسى بارىسىندا تاراپتار «جۇڭگو – قازاقستان – تۇرىكمەنستان – يران» ءدالىزىن بىرلەسىپ دامىتۋ تۋرالى ۋاعدالاستى. ەكى تاراپ سونىمەن بىرگە «سولتۇستىك-وڭتۇستىك» ءدالىزى ترانزيتتىك جانە ەكسپورتتىق جۇكتەر اعىمىنىڭ ماڭىزدى باعىتتارىنىڭ ءبىرى بولىپ تابىلاتىنىن اتاپ ءوتتى. ايتا كەتەرلىگى، جالپى وسى جىلدىڭ 10 ايىنىڭ قورىتىندىسى بويىنشا اتالعان ءدالىز بويىنشا جۇكتەردى تاسىمالداۋ كولەمى 15%-عا ۇلعايىپ، 1،7 ملن توننانى قۇرادى.
كۇن تارتىبىنە سايكەس تاراپتارمەن تەمىرجول قاتىناسى سالاسىندا يكەمدى باسەكەگە قابىلەتتى تاريفتىك ساياساتتى قالىپتاستىرۋ ماسەلەسى كوتەرىپ، بۇل باعىتتا اتقارىلعان جۇمىستىڭ وڭ ناتيجەلەرى ءسوز بولدى. كەزدەسۋ سوڭىندا ەكى ەل اراسىنداعى كولىك، ترانزيت جانە لوگيستيكا سالاسىنداعى ءوزارا ىنتىماقتاستىقتى ودان ءارى دامىتۋدىڭ ماڭىزدىلىعى ەرەكشە اتالىپ ءوتتى.
اشحاباد قالاسىنا جۇمىس ساپارى اياسىندا كولىك ۆيسە-مينيسترى ت.لاستايەۆ كولىك سالاسىنا قاتىستى وزەكتى ماسەلەلەر قوزعالعان حالىقارالىق كونفەرەنسيا مەن كولىك سالاسىنداعى حالىقارالىق ىنتىماقتاستىقتى نىعايتۋعا باعىتتالعان ءتيىستى كورمەگە قاتىستى.