مەكتەپكە كىرۋ، وقۋ ماتەريالدارىنىڭ قولجەتىمدىلىگى مەن اسحانادا تاماقتانۋ.
ق ر پرەمەر-مينيسترىنىڭ ورىنباسارى تامارا دۇيسەنوۆاعا وقۋشىلارعا ارنالعان ID-كارتالار ءىس جۇزىندە قالاي جۇمىس ىستەيتىنى كورسەتىلدى، دەپ حابارلايدى Almaty-akshamy.kz.
ق ر پرەمەر-مينيسترىنىڭ رەسمي اقپاراتتىق رەسۋرسىنىڭ مالىمەتىنشە، جۇيە پيلوتتىق رەجيمدە ەلوردالىق №95 مەكتەپ-ليسەيىندە ەنگىزىلگەن بولاتىن. مۇندا كارتادان بولەك، بيومەتريالىق تانۋ مۇمكىندىگى دە قاراستىرىلعان. بۇل دەگەنىمىز – ەگەر وقۋشى قانداي دا ءبىر سەبەپپەن كارتاسىن ۇمىتىپ نە جوعالتىپ العان جاعدايدا، عيماراتقا بەت-جۇزىن تانۋ قۇرىلعىسى ارقىلى كىرە الادى.
«ءبىر كارتا ارقىلى وقۋشى كىتاپحاناداعى وقۋ ماتەريالدارىن الادى، مەكتەپ اسحاناسىندا تاماق ساتىپ الادى، قالالىق اۆتوبۋس قىزمەتىن پايدالانادى»، — دەدى وقۋ-اعارتۋ ۆيسە-مينيسترى ايبات ءىلياسوۆ.
كارتا مەن بيومەتريا مۇمكىندىكتەرى ۆيسە-پرەمەرگە كورسەتىلدى. اتاپ وتەيىك، استانالىق مەكتەپتە باستاۋىش سىنىپتاردا ءبىلىم الاتىن 900-گە جۋىق بالا مەن الەۋمەتتىك جاعىنان از قامتىلعان وتباسىلاردا تاربيەلەنىپ جاتقان 36 وقۋشىعا تەگىن تاماق قاراستىرىلعان. ال كارتا قولدانۋ جونىندەگى مالىمەتتەر تەك اتا-انالارعا عانا قولجەتىمدى بولادى.
«سيفرلاندىرۋ ءبىز ءۇشىن وتە ماڭىزدى. بۇل جۇيەنىڭ اشىقتىعىن قامتىپ، وقۋشى مەن اتا-انا ءۇشىن ىڭعايلى جاعداي جاساپ قانا قويمايدى. مۇندا بالالاردىڭ قاۋىپسىزدىگى ماسەلەسى دە بار»، — دەدى تامارا دۇيسەنوۆا.
سونىمەن قاتار مۇنداي جۇيەلەر پيلوتتىق رەجيمدە شىمكەنت قالاسىندا، ماڭعىستاۋ جانە اقتوبە وبلىستارىنداعى مەكتەپتەردە جۇمىس ىستەپ تۇر. وقۋ-اعارتۋ مينيسترلىگى كەلەر جىلدان باستاپ تەحنولوگيانى وزگە وڭىرلەردە ەنگىزۋدى جوسپارلاپ وتىر.