قازاقستان رەسپۋبليكاسىنىڭ عىلىم جانە جوعارى ءبىلىم ءمينيسترى ساياسات نۇربەك پەن قىرعىز رەسپۋبليكاسىنىڭ عىلىم، جوعارى ءبىلىم جانە يننوۆاسيالار ءمينيسترى باكتيار وروزوۆ ءال-فارابي اتىنداعى قازاق ۇلتتىق ۋنيۆەرسيتەتىنىڭ بىشكەك قالاسىنداعى فيليالىنا باردى.
كەزدەسۋگە قازۇۋ-دىڭ باسقارما مۇشەسى – عىلىمي-يننوۆاسيالىق قىزمەت جونىندەگى پرورەكتورى مارعۇلان يبرايىموۆ، قىرعىز رەسپۋبليكاسىنىڭ عىلىم، جوعارى ءبىلىم جانە يننوۆاسيالار ءمينيسترىنىڭ ورىنباسارى نۇرلان ومۋروۆ، سونداي-اق قازۇۋ فيليالىنىڭ ديرەكتورى جامين شەيشەنوۆ قاتىستى.
مينيسترلەر ۋنيۆەرسيتەت فيليالىنىڭ وقۋ جانە عىلىمي قىزمەتىمەن تانىسىپ، وقۋ اۋديتوريالارىن ارالادى. قازۇۋ-دىڭ عىلىمي-يننوۆاسيالىق قىزمەت جونىندەگى پرورەكتورى مارعۇلان يبرايىموۆ پەن فيليال ديرەكتورى جامين شەيشەنوۆ وقۋ ورنىنىڭ قۇرىلۋى، قازىرگى قىزمەتى مەن دامۋ پەرسپەكتيۆالارى جونىندە تانىستىردى.
قازۇۋ-دىڭ بىشكەك قالاسىنداعى فيليالى 2022 جىلعى 26 مامىردا اشىلدى. ونىڭ رەسمي اشىلۋ ءراسىمى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ پەن قىرعىز رەسپۋبليكاسىنىڭ پرەزيدەنتى سادىر جاپاروۆ قاتىسۋىمەن وتكەن بولاتىن. كەزدەسۋ بارىسىندا مينيسترلەر تاراپىنان ناقتى ۇسىنىستار ايتىلىپ، بولاشاقتا جۇزەگە اسىرىلۋى مۇمكىن باستامالار قوزعالدى. مينيستر ساياسات نۇربەك ءوز سوزىندە اتالمىش فيليالدىڭ قازاقستان مەن قىرعىزستان اراسىنداعى ستراتەگيالىق ارىپتەستىكتىڭ ناقتى ناتيجەسى ەكەنىن اتاپ ءوتتى. «ەكى ەلدىڭ جاستارىن ساپالى بىلىممەن قامتاماسىز ەتىپ، عىلىمي الەۋەتىن ارتتىرۋ جولىنداعى ورتاق كۇش-جىگەرىمىز بولاشاقتا ۇلكەن جەتىستىكتەرگە جەتكىزەدى»، – دەدى مينيستر.
بۇگىنگى تاڭدا فيليالدا 12 باكالاۆريات باعدارلاماسى جانە بەيىندىك ماگيستراتۋرا بويىنشا ءبىلىم بەرىلەدى. ەڭ كوپ سۇرانىسقا يە ماماندىقتار قاتارىندا – «قۇقىقتانۋ»، «مەنەدجمەنت»، «كومپيۋتەرلىك ينجەنەريا» جانە «شەتەل فيلولوگياسى» بار. قازىرگى ۋاقىتتا فيليالدا 750-گە جۋىق ستۋدەنت وقيدى، ال 2025–2026 وقۋ جىلىنا 630-دان استام تالاپكەر قابىلدانعان. دارىستەر قازاق، ورىس جانە اعىلشىن تىلدەرىندە جۇرگىزىلەدى.
سونداي-اق ساپار اياسىندا ءبىلىم مينيسترلەرى قازۇۋ فيليالىنىڭ وقىتۋشى-پروفەسسورلار قۇرامى جانە ستۋدەنتتەرىمەن جۇزدەستى.
جيىلعاندار ءوزارا پىكىر الماسۋعا بەلسەندى اتسالىسىپ، كوكەيدەگى سۇراقتارىنا جاۋاپ الدى. ستۋدەنتتەر وقۋدى تامامداعان سوڭ جۇمىسقا ورنالاسۋ مۇمكىندىكتەرى مەن قوسىمشا ءبىلىم جەتىلدىرۋ جولدارىنا قىزىعۋشىلىق تانىتتى. قىرعىز رەسپۋبليكاسىنىڭ ءمينيسترى باقتيار وروزوۆ ءوز تاراپىنان: «ءبىزدىڭ تۇلەكتەرىمىزدىڭ ەڭبەك نارىعىندا باسەكەگە قابىلەتتى بولۋى ماڭىزدى. ءبىز قازىرگى زامانعى تالاپتارعا سايكەس كەلەتىن جاڭا ءبىلىم بەرۋ ستاندارتتارىن ەنگىزۋ بويىنشا جۇمىس ىستەپ جاتىرمىز»، – دەپ پىكىر ءبىلدىردى.
سونىمەن قاتار باسقوسۋ بارىسىندا اكادەميالىق الماسۋ، بىرلەسكەن عىلىمي جوبالاردى ىسكە اسىرۋ جانە ءبىلىم بەرۋ سالاسىنداعى ىنتىماقتاستىقتى كەڭەيتۋ ماسەلەلەرى كەڭىنەن تالقىلاندى.
فيليال جۇمىسىمەن تانىسۋ ەكى ەل اراسىنداعى ءبىلىم بەرۋ بايلانىستارىن نىعايتۋعا باعىتتالعان ماڭىزدى قادام بولدى.
ايتا كەتسەك، بۇگىندە قازۇۋ-دىڭ شەتەلدەگى فيليالدارى تۇركيانىڭ ىستامبۇل قالاسىندا جانە رەسەيدىڭ ومبى قالاسىندا دا تابىستى جۇمىس ىستەپ كەلەدى.